/

2007年12月31日

07大事回顧及08展望

眨下眼一年又過去了。雖然音語覺得過年其實只是just another day,無乜特別,但都應下節寫下回顧及展望來為加07年畫個句號:

自身方面,07年都算過得去。其中最高興係認識到一眾扑友/網友,更有幸與其中部份扑友見過面。想不到音語一把年紀到此年頭都形可以結交咁多新朋友,可謂喜出望外。不過想唔認老都唔得囉,因為我估年紀輕d既扑友音語分分鐘生得你出(如果當年衰十一)... 在此音語一定要多謝眾扑友錯愛包容小弟。希望08年大家有更多交流。

健康方面亦不過不失,小病是福。年中雖然曾經懷疑自己身患絕症,但託賴只是一場虛驚。但08年仍然要繼續減肥大計了,例如玩多d Wii Fit...

工作方面亦是不過不失。到此年頭音語都算看破了,大升職應該無份(亦唔想升左之後做死)安安穩穩等出糧有時其實都唔算太差,但如有機會音語都想跳下槽比d新挑戰自己既...

投資方面可謂大有斬穫。雖然犯了無數錯誤但總括來計都可拋離大市,主要係因為好運氣買中狂升股票。08年音語估計大市將非常反覆大上大落(而且落比上多),如果有今年一半成積都飲得杯落了。

本扑方面,連這篇計07年開扑七個月寫了83篇。不過就越寫越少,由最初月寫17-8篇跌到近幾月得番10篇唔夠。希望08年可以繼續寫下去。對於寫作音語雖然中文唔好, 但希望繼續寫下去。不過真係要練好d倉頡輸入法先得。

最後都要老套d祝各位扑友忘記過去的種種不好,汲取自己的成功經驗,然後08會更好!

唔知08第一砲寫乜好呢?

開估

差d唔記得開估添,等到過左年先開就唔好啦:

彧,廣東話音郁,國語音yù,有文采的意思。

櫺,廣東話音寧,國語音líng,門或窗檻﹑欄杆上雕花的格子。

芀,廣東話音條,國語音tiáo, 古同“苕”,蘆葦的花穗

紘,廣東話音宏,國語音hóng, 宏大的意思。

有米兄唔知會唔會從上面d字揀返過黎自用呢...

2007年12月27日

威尼斯的嘉年華

在意大利的威尼斯市,每年都會舉辦嘉年華。

嘉年華歷史悠久,可以追溯至1162年。威尼斯為了慶祝打勝仗,宰了一頭公牛及十二頭豬來慶祝。後來慶祝越搞越大,而由1268年開始,人們開始帶著漂亮的面具參加嘉年華。這亦成為嘉年華的一個特色。幾百年來嘉年華經歷過幾番盛衰,上世紀三十年代更被當年的獨裁者墨索里尼的法西斯政府所禁。直至八十年代才再度舉辦,更吸引世界各地的遊客來臨參與。

----------

威尼斯的嘉年華亦是一首著名樂曲的名稱。樂曲旋率輕快,無論用笛、喇叭、低音號、結他或鋼琴演奏,均能表現出嘉年華的歡樂景象。

----------

在遙遠的一個小城,這一天是鋼琴比賽決賽。

這孩子是參賽者中最年少的一位。老實說孩子的水準不算太高,父親亦懷疑是不是初賽的遴選出了問題,否則孩子應該沒有可能入圍。但為了不令孩子緊張,父母只說這只是一場表演,隻字不提比賽兩個字。

比賽開始,其他參賽者水準之高,不禁令父親暗暗吃驚,更擔心孩子的水準會和其他參賽者相差太遠。其他小孩子不但水準較高,而且準備充足。男的很多都穿整套西裝,女的都穿訂造的華麗裙子。相反孩子只是穿比平時隆重一點的服飾而已。

最後終於到孩子出場了。孩子氣定神閒,先對聽眾鞠躬,然後坐下彈奏樂章。

孩子輕輕鬆鬆地彈奏出悅耳樂章。雖然不是彈得很出色,但所彈的每一粒音符,都深深打動父親的心靈。聽在耳裏,父親不禁熱淚盈眶。孩子的表現鎮定,令他驚歎孩子原來已經長大了。表演完畢,爸爸不禁為孩子的表演感到驕傲,忍不住哭了。

最後,孩子三甲不入。但在父親心目中,孩子應該名列第四。

2007年12月24日

唔怕生壞命...

...至怕改壞名。現代人可能生得少關係,所以俾下一代既野都比以前多。甚至乎改名,好多人都會找風水先生夾下時辰八字要幾多劃五行要添d乜,所以好多少用既字依家都有人會用黎做名。可能音語讀得書少關係吧,有d字音語真係連讀都唔識讀。今日音語就領教過幾個新字啦:






有時諗下個小朋友成世都比人讀錯名, 其實都幾慘...

2007年12月16日

再談補選

仲以為政治係票房毒葯無人鍾意睇,但估唔到去到今日七十同三點仲有興趣講,似乎音語想唔回應都唔得。

1.音語未有解釋點解只投畀獨立人士,我要講o既係,有政黨未必唔好,獨立人士也未必好。

我只投獨立人士既原因係因為覺得很多時政黨做事只為爭取選票。在一些小眾同意的議題上政黨十次有九次都會反對。例如音語反對最低工資,又有那個政黨敢無流失選票去反對呢?連為工商界的豉油黨及(扮)中產的公文袋都竟然讚成,音語又有甚麼好講呢?既然有獨立候選人反對最低工資,音語又有甚麼理由不投她一票?


2.我唔認同唔投七號就係等於唔支持民主,亦好肯定七號今次唔告急,輸梗。狼來了唔可怕,選民要告急先肯出黎投票才最可怕。

音語不太同意七號不告急輸緊。如果真係輸都係咎又自取。明明一早拋離幾十個身位,都可以不斷犯錯俾人追貼,如果真係輸,可以怪得邊個?最終贏四萬幾票我諗唔算贏得險卦?


3.必須提醒的是,由於音語極有可能無參加任何跟民主派有關的組織,所以民主派根本無從入手向閣下拉票,即使有閣下的聯絡方法,民主派也不會有左派一樣的資源,打電話畀閣下。

呢點絕對同意三點說法。


有人認為選七號就是支持民主而選四號就是助紂為虐,這點音語絕對不同意。甲之熊掌,乙之砒霜,有些人覺得黑白分明,有些人覺得是兩個爛橙揀一個,甚至有人真心覺得四號比七號實幹所以投四號一票。但音語就是揀唔落手。揀唔落手就寧願投俾一位和音語見解相同的候選人,即使她當選的機會是零。若明年她再出選,音語依然會投她一票的。

自我中心

自我中心是很多煩惱的主要成因
若只從自己去想
會對別人的所作所為感到困惑
覺得對方是針對自己
或莫視自己的意見

人若果可以抽離自身
從另一個角度去看問題
會有另一番體會
會有很大機會解開問題的癥結
可惜音語只是有口話人...

2007年12月8日

電梯百態

香港應該是全世界電梯密度最高的城市。

香港的節奏急促,從電梯按鈕的耗損可見一班。

每部電梯內都有很多按鈕。當中最少人按的應該是警鐘;而最多人按的,相信非關門(DC)掣莫屬。

跟據音語觀察所得,按DC掣的主要方法有三大種:

1. 狂按。有些人以為關門掣按多幾下門會關快些。有些人甚至會在其它人未全部離開電梯前已急不及待按掣關門。此外這類人亦經常在等電梯時狂按鈕,認為(妄想)電梯會快些到達。不怕得罪講句,音語懷疑這樣做的人是患有燥狂症,有時都想對他們講,「阿生,你咁樣㩒部𨋢唔會行快d架喎。」

2. 不按鈕。 音語傾向這樣做。如果你有留心觀察,你會發覺很多電梯門是會在搭客離開後一秒內自動關閉的。既然明知門很快便會關上,其實又何苦按鈕呢?

3. 按一下。大多數人都會這樣做。音語認為這是最正常的做法。然而按一下也有兩款變種。有些人是先按要去的層數然後才按關門鈕;但音語也見過有人先按關門鈕然後才按層數。音語懷疑這樣做若果按層數慢了一點,電梯是有機會向相反方向走的。

此外,自從沙士以後,有些人為了注重衛生,會不用手指直接按鈕而用鎖匙按鈕。不知這類人回家後會否把鎖匙消毒呢?

外國很多地方由於步伐比較慢,電梯是只有開門鈕而沒有關門鈕的。若果香港效法的話,恐怕很多人會投訴吧?

2007年12月3日

補選

既然上集講左區議會選舉,音語今日都要講埋下集立法會補選。

先講一下音語既投票往績。自九十年代中音語有資格投票後,音語只有兩次錯過投票 ﹣分別是去年的專業界別選委會及過去的區議會選舉。在過去這麼多次選舉中,音語從未投過任何政黨一票。音語的一票,只會投向沒有政黨的候選人身上或廢票,今次亦不例外。

今次選舉有八名候選人。四七大熱單Q音語是不會投的。其餘候選人有林超榮,道士先生,大律師,中國女排,細鬼及飄逸外藉人士,可謂盛況空前。

音語的一票本來是準備嚮應必媽及hana的廢票聯盟的,但可惜原來現在投票是用圖章。音語忘記帶筆,不能在選票上大書「揀唔落手」四個大字,所以神聖一票亦改為投與一位明確表明反對最低工資的候選人。

雖然音語明知除了四七單Q外其它候選人是沒有機會的,但音語對大熱單Q並無好感,亦十分討厭被人屈。難道不投七號就是不支持民主嗎?每次選舉都臨急抱佛腳去告急,總有一次是會狼來了的。

仲有音語亦好唔鍾意告急呢個詞語。好似小朋友好急要舉手告訴老師咁,無黎貴格。可唔可以用個好D詞彙呀?

值得一提的是音語由於是工聯會會員所以每次選舉都會收到他們的電話,相反音語從來未收過民主派的電話或sms. 或者在他們心目中我是不值得爭取的異類吧。

最後結果一如民意調查結果一樣大熱勝出,而這場鬧劇亦宣佈落幕。

2007年11月25日

共建和諧辦公室

最近,音語的辦公室氣氛祥和了不少,同事之間雖然依然偶有爭執,但整體來講,大家一條心談同一話題的機會多了很多。

以往大家除了公事以外,便沒有甚麼其他話題好談。但不知是誰開始提起這話題,便一發不可收拾。

工作上的話題,無論是大家想互搏上位你爭我奪或互相射波你推我讓,三句唔埋兩句終會吵架收場。相反,在這話題上大家處同一陣線同仇敵愾的機會大很多。這話題是甚麼?當然是股票啦!

跟據音語非正式調查所得,蔽公司八成以上的同事,上至老細下至茶水部阿嬸,都有投資股票,而活躍投資者起碼都有一半以上。

在股票這話題上,除了買跌的人外,大部份人都是站在同一陣綫的。當大市向上時,大家都覺得身心舒暢;相反當大市向下時,大家都會非常緊張。

在股票這話題上,同事之間亦會發揮互助互愛的精神。由於大家所買的股票未必一樣,所以當知道同事的股票表現優於大市時,大家都會為他歡呼;而當同事的股票比大市表現差時,大家都會為他擔憂。同事互相關心的機會自然多很多。

有部份同事可能會沽空大市。但相信這些同事由於逆大眾之意而行,音語相信他們並不會大肆張揚影響公司和諧氣氛。悶聲發大財嘛!

就是這樣,大家談少了會吵架的話題,談多些大家高興和關心的話題,辦公室自然比以前和諧得多。

2007年11月19日

區議會選舉

今年區議會選舉,音語並無去投票。

先講一下本選區既情況。本區主要係三條街既一邊馬路造成,前面兩條街係傳統地區勢力,而程宅所處第三條街係所謂中產地區。

如此組合好明顯地區勢力只要無乜閃失,照顧好自己票倉就穩奪議席啦。而本區現任議員亦順理成章地漠視程宅所處一條街,將大部份資源照顧自己鄉里。

上一屆本區唔知咩事竟然有兩名立法會議員對撼,所以選舉氣氛都幾濃厚。音語由於兩名立法會議員都選唔落手,所以上屆將神聖一票投給第三名候選人。而今屆竟然得現任議員同另一位不見經傳的人出來參選,自然令音語提不起興趣投票。本來音語都有諗過投挑戰者或投廢票,但挑戰者實在太不知所謂,揀唔落手,所以音語最終三過票站不入,放棄行使神聖一票權力。

音語真係唔明點解對面街(都係比較中產)咁近會係另一選區,而隔兩條街其實相對比較遠竟然會係同一選區。事實上,音語見對面街果位議員多過本區區議員。雖然唔同區但音語有時都會幫佢拎張工作報告單張睇下,而音語亦覺得對面街議員又落力又做得野,有得揀音語一定會支持佢。

結果兩條街都係現任議員大比數勝出,可謂意料之內。

就黎又立法會補選了。兩位熱門音語都覺得揀唔落手,咁我呢一票係唔係應該投廢票算數呢?

2007年11月18日

用字

對於用字,音語係有種近乎偏執既堅持。例如音語係好怕人用贏輸黎形容買股票既。

你用得呢兩個字,其實你已經係有種賭博既心態。你已經係有揾快錢既心態。咁股價快上快落(快落多D)你應該預左架啦!

相反如果你係用賺蝕黎形容股票既話,你係當佢係一盤生意黎run, 短期既賺蝕並唔係咩大問題。只要你選既股票係優質股長揸就無問題。

可能你會覺得用字唔駛咁執著,但音語始終認為用字係反映你既心態既。如果你真係想投資而唔係投機,咁就最好唔用贏輸黎形容你既投資啦。

2007年11月10日

再不在乎

好朋友暢快的聚會
得知你生活還很寫意
悠長假期悠然自得
我也感到很欣慰




或許
若可拋開包伏
當再不在乎
做自己想做的事
感覺自然會完美

2007年11月9日

程音語晴陰雨呈陰乳

頭先一篇係玩野,呢篇先係正經。

程音語呢個名既出處其實係從天氣而來的。話說若干年前我和同事出差,可能講到無野好講掛,食飯時大家聊起天氣。當天早上放晴,中午轉陰天而晚上有雨。我便說當天的天氣是晴陰雨。講下講下,覺得幾似一個人名,自此晴陰雨便在我腦海中佔了一個席位。

時光飛逝,轉眼已到2007年。眼見很多人寫扑,而我亦想苦練中文輸入法,所以我便想到開一個扑 - 其中最重要的就是起一個好的扑名。

我有個朋友的筆名是姓程的,我覺得都不錯,所以我亦想改一個差不多的名稱。

湊巧今年五六月時又是經常時晴時陰時雨,我便想起幾年前晴陰雨這個名稱,再將它稍為改變一下,便變成程音語這個名字。滿腦子歪念頭的我,再將這名字再扭一下,便得出呈陰乳這個名來。

順帶一題,當我將程音語這名字告訴其它網友時,其中一位竟然也有差不多念頭,說: "嘩,個新名,又陰又乳,有冇鹹D呀?"

就是這樣,幾年前一段戲言,再加上機緣巧合。《程音語的晴陰雨》這個扑就誕生了。

正如我的簡介所講,我是希望這個扑可以三分天下,正經時叫程音語, 感性時叫晴陰雨, 鹹濕時叫呈陰乳。只可惜音語一來懶,二來中文不是太好,三來到現在中文輸入法仍未練熟(試過花三小時打一篇150字的短文!),所以這個扑的質量和產量都強差人意。但,我仍然會堅持寫下去的。

我的名字

看到今天怒火眼睛講她名字的出處後,我終於加緊努力寫好這篇倉底存貨。

究竟程音語這個名字有甚麼典故呢?

其實一字咁簡單,程音語是我的真名。家父家母一個喜歡音樂,一個喜歡語文,所以我的名字就叫音語。

咁樣寫會唔會俾人打呢?

2007年11月1日

再黎夏令時間

既然俾人騎劫左個主題變左做體育版, 音語唯有另起爐灶再寫夏令時間。

自從香港取消夏令時間後, 音語漸漸對夏令時間淡忘。

那年代電視並無好像現在這麼多直播足球,雖然音語有聽BBC星期六的足球直播節目,但並沒有對夏令時間有太大上心,只是不知為什麼忽然間直播會延遲一小時。直至音語到美國讀大學,到了十月底時,才再接觸到夏令時間。但當時音語想,只是相差一小時,差別應該不會太大吧。

還記得夏令時間終結那一天,天氣非常差兼有雷雨。音語四點多鐘下課時,發覺天已全黑,才發覺一小時的差別竟然可以這麼大:上一星期放學時天還很亮,想不到過了幾天下課時竟然好像夜晚般。

那個冬天亦是音語第一次見到雪,亦是這個冬天,令音語更覺得香港是一塊樂土。

2007年10月30日

夏令時間

靜悄悄的,歐洲地區夏令時間已經結束了,而美洲地區夏令時間亦會於今個星期後結束。若你並不是球迷或炒美股,可能你並不知道有夏令時間這樣東西。

夏令時間是一種為節約能源而人為規定地方時間的制度,在這一制度實行期間所採用的統一時間稱為“夏令時間”。一般在天亮早的夏季人為將時間提前一小時,可以使人早起早睡,減少照明量,以充分利用光照資源,從而節約照明用電。

年輕的網友可能不知道,原來香港80年代前是有實施過夏令時間的。音語尚記得,一個星期天早上當音語如常地去童軍集會,到達後只有幾位隊友在場,大家呆了一會後便出走出操場去玩,過了差不多一小時後導師及其它隊友才到場。後來音語才知道原來當天是夏令時間終結,音語早了一個小時到場。

至於為甚麼家人沒有提醒音語,恐怕已無從稽考了。

2007年10月27日

露出馬腳

手術室內
露出馬腳
大大隻
大隻過阿大隻翼

忽然想起德國鹹豬手
好相似
好想食

係唔係變態呢

2007年10月19日

Princess 長平

據野史相傳,長平公主十六歲時,崇禎皇帝將她許配給都尉周世顯,然而婚事因為流寇的逼近而暫停。李自成攻入北京的消息傳到宮中,崇禎心灰意冷,要周皇后自裁、袁貴妃自盡,對長平公主嘆了聲:「汝何故生我家!」遂揮劍斫斷長平公主左臂。民間相傳長平公主於明亡後出家為尼,並學得一身武藝,是為獨臂神尼,並進行反清復明,收了呂四娘等人為徒。而金庸小說碧血劍的阿九和鹿鼎記中的九難亦是以此傳說的長平公主為原型。

抄完一段文入返正題先。音語認識一個網友的msn display name 是Princess 長平。她說她讀書時都學過粵劇。Princess 長平亦有俠義情懷,大情大性,然而最近遇到點麻煩,所以化身為另一惹火角色繼續闖盪江湖。

相信大部份人對長平公主認識是投過任白經典戲寶帝女花。當中香夭一幕更為經典。「落花滿天蔽月光」七個字情景交融意境一流,多一字嫌多,少一字嫌少,唐滌生中文造詣之高實在令人激節。音語有幸去年欣賞到雛鳳主演的帝女花,雖然從電視電影唱碟已經看過聽過不知幾多次,但到香夭一幕時,音語看見舞台上縐紙緩緩落下,台上龍劍笙梅雪詩落力演出時,亦不禁熱淚盈眶。

現今留傳的香夭影視版本,音語認為這個任劍輝、白雪仙在1972年為 TVB 六一八雨災籌款之夜的演出最為經典。任姐仙姐並無任何華麗的戲服襯託,亦無任何化妝造手。只是兩人站在台上,靠著她們爐火純青的曲藝和數十年合作無間的默契,如泣似訴地為災民落力演出籌款,就演出了這幕經典。




Princess 長平,你都要加油呀,大把人撐你架!另外,你又唔駛咁驚架。亂諗野盞係諗埋一邊架。除左你個扑之外,音語都有其他經Google Reader subscribe 的扑有同樣問題,失驚無神有十幾個舊post標出黎。所以我覺得應該係Blogspot.com既問題,無咁易有人hack 你架。

2007年10月16日

無mood

已經不只一次了
扑文寫到一半
或留言差不多寫好
突然覺得無mood
便立即將它刪除

現在我的文章中
已經有四篇寫了一半autosave的存貨
尚未計已經delete了的幾篇文章

究竟
這只是一個樽頸
還是我已經無貨

2007年10月12日

回歸

好了,
早排小休d扑友大部份都回歸了。

咦,好似仲有一個未返黎喎...

<<號外>>
最新消息,都返黎啦! Welcome Back, yeah!

2007年10月6日

自拍照

陰乳身裁係唔係拍得住桃紅3pm呢? 嘿嘿...


2007年10月3日

花妹妹

十月三日,午飯前時晴時陰時雨。

想不到早前一段戲言,令音語今天竟然有幸與花妹妹相聚午膳。

音語已經不太記得是從那裏認識花妹妹了。只記得最初是被她的投資心得所吸引 -- 因為音語的投資哲學和花妹妹差不多,只是音語開始得比較遲及子彈沒有那麼多罷了。花妹妹的中文非常好。她熟讀詩詞歌賦出口成文。對音樂及藝術亦有很深認識。這都是令音語佩服的地方。

從花妹妹的言談可以知道她是一個聰慧的人。花妹妹很喜歡問問題。她思路十分敏捷,音語稍有詞不達意花妹妹便會隨即加以追問以得個明白。由此可以感覺到花妹妹是一個求知若渴及喜歡開玩笑的人。即使她本身已經很聰明,她也不會放棄任何機會可以增長自己的智識。這種學習態度音語實在非常欣賞。

花妹妹十分漂亮。大大的眼睛,加上一頭亮澤的頭髮,使音語不禁一看再看而有點失態;再加上花妹妹一個一個的問題向著音語發問,令到音語招架不下而經常答非所問。今天的音語表現實在是太差了!還望花妹妹見諒。

午膳的環境相當優美但食物水準尚可改善。縱然這樣,音語覺得和朋友吃飯,食物的質素固然重要,但最重要的其實是和朋友的交流。今天和花妹妹一聚雖然時間不夠長,但大家在投資,用錢態度及生活等題目均互相交流了看法。音語實在獲益良多。

到午飯終結大家道別時,天公已經造美了。或者,天公也在反映了音語的心情吧。

2007年9月30日

廿多年的疑難

想唔到一個廿多年前解決唔到既疑難,今日音語終於成功破解了。

雖然今日只係照住說明一步一步咁去做,但我廿幾年前都有試過在街邊俾幾蚊去買份秘笈(好似電影《功夫》橋段),但唔知係果時音語少年無知定係份秘笈係流野,少年音語無論點都係破解唔到。

想唔到今日音語終於參透到呢份《七步成功》秘笈,解破左呢個廿幾年既疑難。下一步音語希望可以唔駛睇秘笈都破解到。話唔定遲D可以代表香港隊都唔定,嘿嘿嘿...

2007年9月26日

月圓之夜

月圓之夜
紫金之巔
一劍西來
天外飛仙

古有白雲城主葉孤城與劍神西門吹雪驚心動魄一役名垂千古
今有程音語與K君中秋之夜秉燭夜談暢論天下事

音語有幸於中秋再與K君相會
因K君酒量較淺
音語乃君子絕不乘人之危
故以茶代酒高談闊論科技發展也

想不到雙方對某種科技對現代人的毒害之見解完全一致
確是英雄所見
今夕一會彼此皆獲益良多
確賞心樂事也

2007年9月23日

揩焚

跟據外電報導,在最新的牛津字典 (Shorter Oxford English Dictionary)第六版,有約一萬六千個本來有Hyphen的字,被修改為無Hyphen。語言專家指出,Hyphen之死罪魁禍首是人們在寫e-mail (注意: e-mail 是有hyphen的, 不是 email) 時懶得打 Hyphen,以及很多人都不清楚Hyphen的正確用法。

音語是一個對標點符號非常敏感的 Old School 人。我甚至乎在打文章時會使用 non-breaking hyphen。看見這個報導,實在覺得心有戚戚然。雖然語言應該與時並進,但一些好的傳統不是應該保留的嗎?

從今以後,bumble-bee 會變做 bumblebee, 而ice-cream則會變做 ice cream 了。

就讓我們向已消失的揩焚默哀片刻吧。

伸延閱讀:
BBC的報導
WSJ的報導

2007年9月16日

又係網聚

在一個非常意想不到的情況下,我和某著名網友昨天網聚。

姑且叫這網友做K吧。 我和K其實是鄰居,可能以前未認識前已經在某一日响街上偶然咁遇到,但相信當時我地並無點下頭,亦無問候一下,更加唔會唔知講咩野好 - 因為我地仍未相識。

當天晚上,當我正如常地一邊聽歌一邊單手上網之際,MSN突然傳來K的message, 問我有否興趣一起晚飯。

不得不承認,我對K是懷有好感和有種惺惺相識的感覺。現今社會已經很少人好像K這般博學多材了。雖然K經常說我是通天曉,但和K相比,我立時相形見拙 - 很多東西我吹水吹得到,但K卻是親身體驗過 - 在K身上,你會對一些形容詞,如「靜如處子,動如脫兔」、「動靜皆宜」,甚至乎「不枉此生」,有更深刻體會。

對於K的容貌,我不另外敘述了。但請容音語quote另一見過K的著名網友對K容貌的描述:「K束有一頭爽朗的短髮,面長長,微絲細眼,很有味道。K外表比其真實年齡年輕很多!可能從此佢要叫我做姐姐了!」由於是運動健將關係,K擁有一副健康及高眺的身驅,堪稱骨骼精奇,確係習武之好材料。

我和K到附近一間茶餐廳共進晚餐。K是一個非常細心的人。當我的檸茶送到時,K察覺檯上沒有沙糖,便連忙叫店小二遞上沙糖。對一個初相會的人都這樣體貼,相信K面對小情人時,一定是更加千依百順了。

想不到兩個平時如無需要可以一天都不說超過三句話的人可以有這麼多東西可談。或者,這就是投契吧。我們天南地北無所不談。傾下傾下已經是淩晨一點半了。縱使依依不捨,我們都只好拖著疲倦的身軀回家去。

後記:這是一個很舒服的網聚。只可惜茶餐廳環境嘈吵,所以音語有時聽不清K的說話而可能有些問非所答。另外,由於K眉清目秀笑容可恭,所以音語整晚不禁經常眼金金咁打量K,實在有點失態。希望K不要見怪。

至於K是誰?我想聰明的讀者一定猜得中,音語也無需開估。要開估就讓K自己踢爆吧。

2007年9月13日

End Of The End

今日聽到呢首歌,一聽已被旋律及 Sir Paul 的聲音吸引;再細心留意歌詞,好毒,好有共鳴。

終結的尾聲
就是開始前往更美好地方的旅程
這不算太壞...

Sir Paul 果然寶刀未老。我諗,我都係時候要安排那一天的Rundown 了。


At the end of the end
It's the start of a journey
To a much better place
And this wasn't bad
So a much better place
Would have to be special
No need to be sad

On the day that I die I'd like jokes to be told
And stories of old to be rolled out like carpets
That children have played on
And laid on while listening to stories of old

At the end of the end
It's the start of a journey
To a much better place
And a much better place
Would have to be special
No reason to cry

[Whistling]

On the day that I die I'd like bells to be rung
And songs that were sung to be hung out like blankets
That lovers have played on
And laid on while listening to songs that were sung

At the end of the end
It's the start of a journey
To a much better place
And a much better place
Would have to be special
No reason to cry
No need to be sad
At the end of the end

2007年9月11日

頭痛

今日頭痛想買頭痛藥
去到藥房發覺“搣你痛“竟然出左幾十款
有正常有特效有特快有特快水溶有長效有傷風感冒有兒童裝有經痛裝仲有特強傷風感冒
仲要有D有正常包裝又有隨身裝

大佬我家陣頭痛呀
你仲俾咁多野我揀
真係想我諗到頭都爆呀
結果我求其買左合“落餸“無咁嬲


後記:頭先睇電視廣告先發覺原來仲有腰背痛裝...

2007年9月9日

網聚

無啦啦我都有份去網聚。

最初喵喵邀請我時,我都有D猶疑,始終我同大家唔係咁熟,曾經有諗過揾個藉口推左佢 (例如香港人唔過九龍, 屋企十二點鐘會鎖門等等),但最尾都決定出席。

到達後發覺七友中部份已經相識,起初我其實幾擔心同大家唔熟好難插嘴,但傾下傾下又無乜問題,成晚氣氛唔錯。

只可惜我尋日由朝早六點幾一路直踩到夜晚十二點,所以到最尾已經身心俱疲。但在大家傾得咁高興情況下,我都可以支持落去無"lui"低。

雖然大家背景經歷都唔同,但多多少少都有一D共同觀點或生活體會。透過互相交流,我諗大家都有所得著,都學到D野。

尋晚真係幾開心,希望大家有緣再見。

2007年9月7日

嗌交的真相

大家睇電視有無見過下面一幕呢?依家等我程導演黎分析下嗌交既真相啦!

去片!
-----------------------
(高級餐廳內一角,音語與女伴,食完野飲緊餐茶)

女伴 (突然大力拍檯大聲嗌):你有無攪錯架!不如我地分手啦!
(女伴頭也不回一支箭離開餐廳)

音語 (驚惶失措):呀Gil, 你聽我解釋啦!
音語(從銀包拿出錢放在餐桌上,然後緊追Gil, 再回頭對侍應說):伙計,埋單唔該,唔駛找啦!
-----------------------

真相:
-----------------------
(侍應生到剛才音語和女伴的餐桌執拾餐具及收錢)
侍應生(發現真相):D你LM!果條友淨係擺低二十蚊就走左,仲夠膽死話唔駛找?
-----------------------
(幾條街外,音語和Gil)
Gil:頭先場戲你都做得幾好喎。
音語:呢餐廿蚊抵食吖!可惜下次唔黎得呢間餐廳添。
(音語與Gil拖著手慢慢離去)
-----------------------
The End

2007年9月6日

成人科學



肥龍,老餅,等你地呀!

2007年9月3日

八月投資小結

在八月份驚濤駭浪下, 晴陰雨寒暑表繼續有不錯表現。 本月恆生指數上升4%, 同期晴陰雨寒暑表亦緊貼大市, 上升3.7%, 今年繼續跑贏大市8.1%,今年頭八個月上升28%。

上升主要動力依然來自莊家(本月繼續升約10%), 另外愛豐仍然有約5%升幅。 表現較為失色的是獅子,略跌3%,然而這代表以股代息可換多些少。 今個月亦有襯大跌市入市(雖然入市時間及策略並不美滿)。略經修改投資組合後,全年股息回報已增加至4.7%。


Points to Note:
1. 九月份開始陸續有新IPO,要小心留意。
2. 細心考慮投資組合及策略應否繼續保持,是否應該略為減少Exposure (10%?)
3. 咖啡店依然未能沽出。可考慮沽出後買入愛豐。
4. 提高自己EQ, 入市前應先重溫自己投資教訓。

2007年9月1日

勾梳成

(茶餐廳內)

陰雨:「伙計,唔該一個波蘿油餐吖,餐飲要茶走。」

(伙計A落單,然後將單送到廚房)

廚房伙計B大聲嗌:「喂!波蘿油賣晒喎!」

聽到伙計B大聲嗌的陰雨:「咦,無波蘿油?咁我唔食啦。」

不慌不忙的老板娘:「唔係,點會無波蘿油呀?(擰轉頭對伙計A)呀A,即刻響收銀機拎十蚊過隔離麵飽鋪買兩個波蘿油返黎!」

陰雨:「......」

後記:以上對話乃經改編的真人真事,陰雨對事頭婆的處變不驚及善用Outsourcing十分佩服,抵你發既!

2007年8月30日

童年陰影 (二) - 荷蘭豆

荷蘭豆, 又名雪豌豆,英文名稱:Chinese Snow Pea, Snow Pea, Chinese Pea, Mangetout。

由細到大, 我都對荷蘭豆好抗拒。

幾歲大既陰雨,已經立志要推動社會進步,所以非常懶惰,尤其係對做家務呢方面。

唔知點解媽媽好鍾意炒荷蘭豆。一個月總有一兩次,而媽媽都會叫我幫手搣皮。

幫荷蘭豆搣皮係一種極度tedious的工作。從小我已經係一個做大事既人, 對於一D小節我唔多理會。所以經常好"乸西"咁搣豆皮,自不然就會俾阿媽鬧到七彩;再加上荷蘭豆有一種唔知點形容既怪味,所以我好抗拒食。

又要做又要俾人鬧又唔鐘意食,當然會好抗拒啦,唔經唔覺咁就一世囉。

到依家當然已經唔需要搣荷蘭豆皮啦,但我依然係咁唔鍾意食荷蘭豆。每次食飯見到荷蘭豆做配菜,我都會好大方咁請朋友食埋我果份。


附圖係兩粒恐怖既荷蘭豆,睇見都驚...

2007年8月28日

交叉點

可能我EQ唔係好高
雖然成日口講話手持既係優質股
兼且成本低長渣無問題
但最近見升得咁利害
都有少少驚
現正考慮賣些少以減少成本
減少自己exposure
雖然可能會賺少D
但起碼心理上會舒服D

心大心細中...

2007年8月25日

童年陰影 - 天橋

喺好耐好耐以前
喺某一個車水馬龍既馬路口
起左一條天橋

我都唔記得
條天橋係木做定係鐵做
只係記得
條天橋每一格之間係空心既
幾歲大既陰雨
每次要上天橋時
都好驚會叉錯腳
一碌木咁插左落去

每次行天橋時
我都希望媽媽可以抱抱
等我可以唔駛咁驚
只可惜大多數時候
媽媽只係會抱阿細佬
就凈低我一個孤零零
嚇到鼻哥窿都無肉
眼淚水都標埋
同條天橋搏鬥...


後記
條天橋已經拆左十九幾年
但早幾個月喺無記某個播舊片既節目入面
我又見到果條天橋
童年陰影又曆曆在目
我好驚行差踏錯呀...

2007年8月22日

給媽媽的信

媽媽,

今天探爸爸,看見那個已生銹的紅色鐵架時,我又想起這件從未跟別人說過的往事。

應該是三十年前了。一天放學回家,我看見一個鐵架,是爸爸店鋪用來擺設貨品用。

你問我想把它油什麼顏色,我說紅色,因為紅色是我最愛。隔了幾天,我果然看見一個紅色的鐵架在我眼前。

它只是一個實用的鐵架,一點也談不上美麗。但到今天,即使它已生了銹,它還是在默默地堅守崗位,盛載貨品。

我已跟爸爸說好,若有一天他不需要這鐵架時,將它給我保管。

媽,我沒有易亦那麼幸運,可以翻查舊報紙去了解你多一點,但我希望這個鐵架,可以幫我盛載對你的回憶。我會將它重新油好放在家裏,即使它和我家格格不入。

還記得小學四年級開學的第一天,我帶著睡眼惺鬆上學時,曾經想過我是不是還在睡夢中尚未起床。每當我失落時,我都會想起這件事。但願我還是在那夢中,一切可以從那天開始過。

媽,你好嗎? 我在想你。

不孝子音語上

幸運

今日奇想:

可能每個人都會接收幸運及不幸
但有些人tune正台接收到幸運
有些人tune錯台只接收到不幸

係唔係應該tune番正個台
等到幸運降臨時
可以接收到

2007年8月18日

回憶

物件是會消失的
事件卻是永恆的
回憶就是一些發生了的事件
歡喜的悲哀的
自己記得就好了

2007年8月17日

中伏

這幾天的大時代,我中了伏。

明明已經告誡自己,不要在大跌市一開始就入市,但EQ低的我抵受不了昨天早上大跌的誘惑。

到了今天,當然發覺入貨太早。

大市看來還會有機會再跌的,但經此一役,子彈已經相對少了, 而心理上亦會有點患得患失,可能會錯失機會。

似乎我是急需提高自己的EQ方為上策。

唯一慶幸就是到今日為止今年我只是賺少了,還有錢賺。

2007年8月14日

流星雨

若果不是易亦吹雞點名,我是不會再想起這件往事,甚至可能已經把它遺忘了的。或許她說得對,我是應該趁我尚記得時,記下以往的甜酸往事。雖然這只是一個很自私的單戀故事:

應該是1998年吧。 那年11月香港突然掀起一陣獅子座流星雨熱潮, 據說是百幾年難得一見的奇景。

我心中的她對流星雨十分有興趣, 而我得悉她有計劃去看流星雨, 當然義不容辭去替她找資料。 除了上綱查報紙之外, 我更加詢問中學時代的天文學會同學, 只為了找一個理想地點去欣賞這難得一見的天文現象。

中學同學潑我冷水,說流星其實不是甚麼奇景,況且香港太多燈,未必可以看到 - 但當然他不知我是另有目的。

只可惜我並不是和她一起去看流星雨。 她和她的友伴去看, 而我則和身邊人去。

她是到赤柱去看流星雨的。 我由於路上太多車到赤柱的關係,去不到赤柱, 只好把車停在舂磡角。那裏已經有數十人在場。 我和身邊人連忙找一有利位置席地而臥。可能香港真是太多燈太光明吧,在舂磡角幾個小時,只是見到零星的幾顆流星,根本上連許願的機會都沒有。
我雖然和身邊人一起,但自私的我,心裏面卻是想著另一個人。

到後來我們決定到赤柱去看那邊情況。當然,心裏面我其實是想碰碰運氣,希望見到她。當然我的歪念並不能得呈,見不到她。而我只好失望地回家去。

後來不知何解,每年十一月都有流星雨,但大家已經對此失去興趣了。

2007年8月13日

正能量

唔知究竟係緬懷舊事,定係真係睹物思人或觸景傷情。我經常釋放負能量。

其實唔開心野間中諗下當發洩就好,但千祈唔好太沉迷。

因為如果淨係諗d唔開心野,會釋放負能量,結果只會吸引更加多唔開心既野返黎。

最嚴重一次,我為左佢,試過成個半月都唔開心,笑都無笑過,攪到全世界都驚左我,結果就緊係越黎越唔開心。而佢,當然是唔會/唔敢理我。果次我差d以為自己今生都係咁渡過。因為我完全諗唔到點樣可以解開個困局 - 果次亦係我第一次發覺原來諗野係可以咁傷神,甚至可以攰過做運動。I was simply mentally drained.

後來唔知點解慢慢諗通左,釋放番d正能量出黎,結果就吸引返d開心野返黎。而最終佢都肯睬返我。

大家無須對號入座。因為我係講緊我自己。當然,我到依家都做唔到完全唔去諗d唔開心野。

2007年8月12日

拾人牙慧之 【風‧月】

無人夜空
心可想誰
不捨依依
只為苦戀

一天說不
心碎如悲
情歸何處
去日方知

2007年8月8日

立秋

立秋之日
涼風未至
颱風先至
塵雨飄飄

按: 立秋仍中國廿四氣節之一, 和()架生去隻()並無關係. 以上短詩仍作者身痕時有感而發之作.

2007年8月7日

夕陽




今日心血來潮,放工去睇日落。

由於最近幾個星期天公造美吹南風,使香港天天天藍;再加上近兩日天降甘露,所以天氣並不太熱,令到睇日落更加舒服。

到達目的地,已經有十多人在場。當中有拍友兩名,亦有日本遊客,老伯一名,以及印度一家。

但見夕陽西斜,我拿出傻瓜機一部,留下美麗情景。好正。

但過十多分鐘,突然有一班攝影班學生殺到,仲一人手拎一套專業架生,好 Pro。

我見相形見拙, 加上目標已達,故即閃。


2007年8月4日

易亦

和大部份扑友一樣,我係從喵喵那邊認識易亦。

最初大家都只係在貓窩裏你一句,我一句吹水,但沒有什麼特別交流。感覺上佢係一個好爽朗既人。

間中我亦有到佢個扑到睇睇。但扑文同佢既留言風格有些少唔同,比較感性,令我見到令一面既亦亦。

直至喵喵和北北到左最關鍵事刻,我見到一個肯為朋友出頭的亦亦。我心諗,呢個朋友交得過。

後來機緣巧合,我同亦亦開始在MSN上有些少交流。雖然素未謀面,但我感覺同佢幾啱傾。最重要既係,從同佢既對話中我發覺佢真係一個好關心朋友既人,呢點令到我好impressed。

傾下傾下亦亦問我有關足球既消息,湊巧我上星期正在放緊一個悠閒假期,無咩野做,所以我到圖書館碰下運氣 kill 下 time,又咁好彩比我搵到些少啱佢用既資料。

如果易亦唔係咁為得喵喵,我都未必會有機會同佢又MSN咁啱吹到足球而去幫佢既。種善因得善果嘛。上星期我聽到有人講過:「幫到人其實係一種福氣。」我諗,我都係同自己積緊福啫。

最後都要多謝易亦竟然將我同人氣小珠相提並論,等我可以滔些少光。希望無影衰到小珠啦。易亦竟然將我同人氣小珠相提並論,實在唔係幾妥。你知啦,我咁大隻,遮住阿小珠就唔係幾好意思啦!

2007年8月1日

七月投資小結

七月恆生指數上升6.5%, 同期晴陰雨寒暑表亦大發神威, 上升10.1%, 跑贏大市8.3%。寒暑表亦比年初預測早15個月踏入另一個新里程。

上升主要動力來自莊家(一個月狂升約20%!), 另外四叔提款機亦開始印銀紙, 今個月都升10%。 愛豐最尾幾個交易日大跌但仍錄得10%升幅。 抽新股亦有不錯回報,回報未能提高只怪自己策略有所出錯。 經過今個月投資整合後,全年股息回報最新展望可達4.5%。

Points to Note:
1. 賣IPO股票要Set Two-Way Limit。 沽出限價可set高D, (特別係有要事在身時), 如許可的話止蝕價則要隨著股價升高而提高。

2. 投資組合應維持現狀及策略。 雖則咖啡店已經佔組合好少份量,但如果有好野都可以考慮止蝕騰出空間。

是日金句

於陳兄個扑留低左呢句, 自己都覺得唔錯, 所以忍唔住唔怕面懵都要quote番自己:

十個炒股九個吹水, 賺既就講出黎晒命蝕既就唔話你知...

2007年7月29日

我愛香港

本來諗住七月收爐唔寫扑, 但最近買了夕爺新書《我所愛的香港》, 睇左最近兩集港台節目《想一想香港》, 又讀過安諾勿斯同cm既睇法, 都忍唔住答番幾句嘴.

香港有好多野係好差, 例如政策過於傾斜地產商, 攪到好多人創業做老板其實係幫業主打工, 填海填到我諗過多幾年睇怕我可以行路過海, 市民受某些保守勢力唆擺搞到好似民智未成熟咁, 藝術文化同淫褻都唔識分, 空氣又受大陸影響搞到越黎越差, 近排空氣好返d但又熱到黐Q綫, 我早幾年仲好心灰意冷, 仲諗過移民添... 但其實內心我仲係好鐘意香港既.

最記得十幾年前, 在外國讀完書返香港, 在啟德機場一踏出飛機果一刻, 雖然眼鏡立即霧化, 一入到室內又聽到兩個維修技工小黎小去媽媽聲, 但果一刻我真係感覺好親切. 終於返黎啦! 仲有千般不是, 這裏始終是我家.

有幸聽過一個香港很有名的銀行家在一個私人聚會講過, 大意係大陸銀行同香港銀行服務水平仲差好遠, 即使一個人需要一個man-day training 就可以追到香港水平, 以國企銀行幾十萬員工計, 香港十年八載之內都仲未駛驚.

當然佢一番說話係簡化左, 令聽眾容易明白, 如一個man-day training 根本就唔足夠追到香港, 同埋公司只要有到達一個 critical mass 數量的員工改變後, corporate culture 就會隨之而改變, 可急速影響其他員工, 但我諗佢想帶出一點, 就係香港而家仲有優勢, 同大陸有距離. 即使唔可以擴展, 但我地只少都要keep住呢個優勢.

大家要努力keep住呢個優勢呀.

2007年7月28日

Good Luck



The sky is blue, the future is bright.

No matter what happens I'll be on your side.

2007年7月23日

我又黎亂諗野...



成人電腦班, 上網班?!

喂,唔該通知盲光社或淫審處黎掃場吖!

溫馨提示



「切勿撞擊 防止爆瓶」

大家覺唔覺得酒廠好好,驚死你出事呀?

2007年7月22日

深宵獨行

今晚心血來潮,深宵獨行,獨自駕車環島遊。

晚上的街道是十分寧靜的。除了幾批深宵車聚的電單車黨和十分勤力維護香港交通安全的警察叔叔外,路上沒有太多其他汽車。

臨出門前和亦亦網上小聚,原來她是一個神勇女車手,對她喜愛的汽車性能暸如指掌,她對汽車的態度和熱誠實在令我感到慚愧。

今夜低速行走,一小時只走了40公里,回家後仲隊了一支大啤,及觀看Dr Who Season 3.

2007年7月21日

書展

終於忍唔住都要講下書展。

已經有五年無去書展了。起初我每年都有去,但自從書展越搞越大規模,我怕人多,所以呢幾年都無去。買書,到閣樓書店買一樣有折頭啫。

每年書展主辦商都在標榜有幾多十萬人入場。但睇書唔係應該靜靜地睇先啱咩? 咁多人咁嘈點睇書呀?

P.S. 今年唯一想買係呂大樂既號外三十年珍藏本。其它書暫時未有特別強烈意圖要去買。

2007年7月18日

今天真的很高興

今晚的一頓晚飯簡直是Perfect。 和最心愛的你一起,你沒有平時的忐忑,餐廳氣氛一流,只有兩檯食客,侍應仲多過客人,食物又非常好,特別是蒜茸包同鵝肝risotto。食完店長仲送超好味三合一甜品,連平時不吃朱古力的你都一吃再吃。

如此良辰美景,不知我甚麼時候才有福份再享? (當然,最好可以附加香吻一個)

2007年7月17日

機鋪

屋企附近最近開左間新機鋪, 今日放工經過入左去睇。

唔睇尤自可,一睇先知自己原來真係好耐無去打機。 入面d機見都未見過,似乎我既打機記憶仲係停留於一蚊鋪既俄羅斯方塊同street fighter.

機鋪內好多人玩打鼓機同太鼓機,睇落都幾好玩。本來我都想試下玩,但見到個個都玩到好似Ringo Starr + 細榮 + 陳友 + Ricky 朱 + 奥山真澄上身咁,都係唔好獻醜啦,揾日weekend朝早無乜人先黎玩好d。

2007年7月15日

網聚

經過幾個月扑上交流, 他和網友真身網聚。

他用了一個女性名稱行走網上。他們從未見面, 連相也沒有交換過,但從她的文筆相信是靚女一名。 相認信物是一人一本扑界巨著「追揸沽」。

晚上七點半。尖咀五支旗杆底。人來人往。竟然有十多人拿著「追揸沽」,那怎樣才可相認?

他靈機一觸,想起大家談過最喜歡迷失中環一篇,於是揭去148頁,希望可以吸引她注意。

這招果然奏效。有人走過來,問:「你好,我叫程音語,見你在看“迷失中環“這一篇,請問你是不是XXX?」

只可惜,這位程音語竟然也是個男人。

大家相對苦笑。

2007年7月11日

好靚封面



好似兩個人... 唔知做緊咩野呢...

2007年7月10日

時間旅行者

他平日嬉皮笑臉, 玩世不恭. 但當面對她時, 卻總是帶點緊張.

他知道不應該和她開始, 但感性戰勝了理性, 他喜歡了她.

曾經他和她非常接近, 只可惜他們相識在錯誤的時候, 註定不會有好結果.

在時間的旅程上, 他雖然身在人群中, 但內心裏他是孤獨的.

(剛剛100字)

2007年7月8日

排隊

近幾日香港興排隊. 有人去排環保袋, 又有人去排波飛.

環保袋單野, 從電視見到, 有好多不滿人士, 話排左好耐都買唔到, 要求解釋.

但明明人地都話係限量版, 買唔到原因咪係賣晒囉! 仲駛乜解釋呀?

買飛單野, 則主要係足總安排失當.

在烈日當空下, 要球迷排十幾個鐘先買到飛. 新任足總主席梁孔德仲竟然講風涼話, 話排隊係球迷既代價. 相信尋日有份排隊既球迷唔爆粗小喇叭都幾奇.

足總仲話上網賣飛唔公平. 大佬, 無人叫你兩萬幾張全部上網賣架, 唔可以部分上網賣咩? 城市電腦售票網晨早都得啦!

若果話要球迷付出代價, 點解唔可以用錢解決呢? 例如早幾年Google IPO時用既 Dutch Auction 方法: 球迷出價買波飛, 足總收晒所有出價後, 就可以plot 到條demand curve, 搵到波飛demand = 波飛supply一點, 就用呢個價錢以上球迷出價賣飛咪得囉. 用錢黎解決問題應該係最唔浪費社會資源既方法.

慶幸尋日要做兄弟, 無得去排隊, 但我要對幫我排隊的J致敬. 辛苦晒啦, 飲茶我既!

2007年7月7日

書評 - 追揸沽

誠蒙渣老版錯愛, 當小弟係佢極少數好友, 慷慨送贈頭版親筆簽名大作一大本.

但眼見眾有名扑客, 如喵喵, CK, 馬沙等都先後收到書, 而我就日日等日日得個吉, 都有D擔心: 會唔會寄失, 又或者比人老笠左? 可能郵差叔叔都係渣蛇讀者, 見到本書, 心存歪念都唔奇掛. 心諗, 今日收唔到不如報警啦.

望穿秋水, 今日終於收到啦! 原來管理員叔叔見本書咁厚, 驚塞落郵箱會整爛, 所以好心幫我keep住先.

講番本書先.



封面係簡約既design, 書名「追揸沽」三個字 「追」字拉長咗擺左邊, 「揸沽」兩個字右邊疊羅漢, 再簡簡單單加d紅黃綠色好似人仔design. 好靚.



細心一睇, 左上角有一d野喎, 會唔會係渣蛇個仔未剪好既臍帶痕蹟呀?



鏡頭一轉, 封底係黑色. 有渣蛇玉樹臨風近照一張, 馬家輝博士對本書推介, 同本書介紹. 封底「追揸沽」logo三個字係紅黃綠三色.



雖然渣老板話簽左十幾本書放左喺紅出版office, 但相信到你睇到呢篇書評時, 十幾本書已經賣晒啦. 有興趣既網友可以download 呢個簽名然後print出黎黐落自己本書度.



成本書264頁, 都幾厚架. 大家即刻拎個五蚊銀黎度下就知啦.



至於內容方面, 當然係正啦, 要慢慢㗳真D. 平時睇扑對住個芒, 好多細節容易睇漏眼, 又難入腦. 睇書就有種質感, 兼且可以去到邊睇到邊. 去旅行睇又得, 搭車睇又得, 去廁所睇又得. 得左. 「追揸沽」, 無得彈!

最後都要再多謝渣蛇錯愛. 本來你出書我一定會買, 如今你慷慨贈書, 小弟無以為報, 心存感激之餘, 亦決定會買兩本送俾親朋戚友.

祝「追揸沽」一版再版, 快趣成為「十本好書」!

2007年7月5日

半年結

上半年恆生指數上升9.1%, 同期晴陰雨寒暑表幸不辱命, 上升14.5%, 領先恆生指數 5.4%.

上升主要動力來自本地大莊家及愛豐狂升. 投資組合七強除了咖啡店外, 大都表現滿意. 抽新股亦有滿意回報.

上半年投資教訓:

1. 抽新股不可本通書睇到老. 有D可長揸, 有D要即閃.

2. 要嚴格遵守自已定下既指令, 尤其係止蝕. 如果我遵守指令, 咖啡店就唔會蝕咁多.

3. 跌市唔好心急入貨. 「股票在下降通道時,不要搶反彈,這樣搶反彈好像半天雲裏掉一把刀下來, 下墜的鋒刀勿試接!」

下半年展望:

1. 全年股息回報可達4.33%.

2. 繼續月供計劃.

3. 積極研究借孖展買獅子.

4. 抽新股要靈活D.

5. 考慮咖啡店使唔使換馬.

2007年7月4日

上一次流淚

人老, 記憶也差了. 我上一次流淚是去年十二月.

那一夜, 我一個人去看雛鳳帝女花. 熱情的戲迷一早已經搶購大部份戲票. 我幾經艱苦, 才買了一張最高一行最邊的單丁位飛.

那是我第一次現場看粵劇. 仙姐和雛鳳對藝術很有熱誠. 每一個場景, 每一個細節, 都非常嚴謹.

到最後一幕香夭, 雖然我已聽過不知幾多次, 但當雛鳳開始唱"落花滿天蔽月光"時, 我已經忍唔住, 眼淚如泉湧.

那一夜, 我被藝術深深感動.

2007年7月3日

祝你一路順風

終於, 是時候你要走了.

雖然你和我們一起的日子不算太長, 但你已深深打動了我們.

有人批評你表現不穩定, 但每當重要關頭, 你都會發揮超水準表現, 為我們帶來驚喜.

我永遠都不會忘記兩年前的一個晚上, 就是你, 令我感動得留下淚來 - 那是我上一次前一次流淚.

有幸我個多月前可以見你一面, 雖然只是離遠看見你, 但我已覺得不枉此行.

別了, 雖然我對你依依不舍, 但我明白這是一個你不能拒絕的機會, 希望你回到家鄉, 可以繼續快樂生活下去.

2007年7月1日

恭喜發財

點解蛔龜騷咁似無線d拜年騷?

點解唔見胡主席好似六叔咁派利是?

點解唔係七一至七三都放假?

今日唔睇蛔龜騷, 唔遊行, 寧願留o係屋企瞓晏覺好過.

月結

六月份
三十日
十七扑
算係咁

2007年6月30日

十年前後

罄捉鄉講迴龜溼憐!

十年前, 解放軍入城; 十年後, 解放軍跳傘.
十年前, 香港落狗屎; 十年後, 香港驟晴驟雨昏昏暗.
十年前, 恆生指數萬八點; 十年後, 恆生指數就黎二萬二點.
十年前, 我裝左有線; 十年後, 我準備cut有線.
十年前, 我人工唔高; 十年後, 我人工double左, 但都係唔高.
十年前, 我以為可以在同一間公司做到退休; 十年後, 我已經轉左工.
十年前, 我經常得罪人多; 十年後, 我繼續稱呼人少.
十年前, 我肥; 十年後, 我仲肥.
十年前, 我作了個當時以為正確的決定; 十年後, 我仍十分後悔.
十年前, 我認識了你; 十年後, 我仍不能自拔, 亦唔介意等多幾個十年.

2007年6月26日

谷歌廣告

裝左 Google Adsense, 希望可以寫扑籌款, 買條三角褲著比喵喵睇, 等佢攪夏日水著大派對.

聽講 Google Adsense 係跟據扑內容再揀適合既廣告, 所以效果會比較好.

可能早排d文比較灰, 所以成日出一個「人生不必如此」廣告.

但最近唔知點解成日出「情定費洛蒙香水」廣告呢? 究竟係base on 咩野呢?

到目前為止, 都只係賺左4.77美金,睇黎夏日水著大派對要到回歸二十年先攪得成囉.

2007年6月20日

大笨象

尋日端午節, 同班friend出黎吹水, 席間有人提起細佬哥時候有呢句口訣:

大笨象
揸支槍
去打仗
打唔X

有人話應該係打唔贏, 亦有人話係打唔成。

究竟X係咩野呢?

P.S. 最近發放太多負能量, 係時候放返D正能量中和返啦。

2007年6月16日

感情事

最近睇見好多扑友都講緊自己感情上d問題.

當中有人例如喵妃娘娘, 已經立定決心, 忘記過去, 準備迎接新感情.

喵妃, 你能夠打開心結, 我衷心祝福你, 因為放得低其實唔係一件易事.

但我就依然唔想放低. 我相信呢個世界係有奇蹟既. 終有一天, 奇蹟會出現.

各人有各人諗法, 無話邊種啱邊種錯. 都係個人喜好黎啫.

2007年6月13日

小心間諜

同學K結婚, 邀請我做兄弟, 今晚一對新人邀請一班兄弟姊妹出黎食飯兼互相認識.

席上一位姊妹話我好面善, 閒談之下, 發覺原來細個大家住同區, 中學時代經常坐同一架巴士返學! 世界真係咁細!

佢仲話幾得當時我同另一個女仔經常一齊上車返學, 但其實果個其實係我細妹.

想唔到竟然咁樣俾人點相, 好彩細個無乜行差踏錯, 如果唔係今日都幾瘀. 不過似乎做乜野都係小心D, 因為原來間諜可能已經於附近徘迴...

2007年6月12日

我們之間

近幾天腦海中經常想起這首歌, 想不到今天坐地鐵上班的時候, 我那有靈性的iPod竟然會響起這首歌. 究竟是不是有些事情即將發生?



付出多少 是不是就要拿回多少
在感情的世界裡 多少算多 多少算少

我對你好 是不是要你也對我好
在感情的天平上 什麼算好 什麼算不好

我們一路跟時間賽跑
我們一直和未來計較
跟往事的是是非非 對對錯錯
苦苦煎熬

那一天我們才能清楚知道
我們曾在同一個地方停靠
(世上的事總是難以預料)
將往事的事是非非 對對錯錯
拋在腦後
都拋在腦後

手勢

星期六晚落雨, 無出街, 在屋企睇倒董先生訪問.

董先生講野時有好多手勢.

呢D手勢係可以有加強語氣既效果. 但如果每句話都用手勢, 就會俾人有一種掩飾自己, 無乜信心感覺.

節目最尾董先生話會在政協副主席呢個位置為國家作出貢獻. 相信國家今次想窮都幾難.

2007年6月10日

緣淺

還以為是天氣影響心情. 原來, 潛意識裏面我已經預計了.

雖然不是第一次, 但我心仍然刺痛.

有些時情是不肯淡忘, 也不會忘記的. 我仍然未走過這一階段. 也不想這麼快走過.

2007年6月9日

淡忘

原來時間係可以沖淡記憶.

今日行街, 在熟悉的地方, 赫然發現幾間陌生既銀行.

銀行應該一直在同一位置好多年, 不過經歷多次收購, 合併及改名, 再加上我又一直無戶口, 所以已經忘記最初名稱.

其他事情, 如果唔係有心刻意記住, 恐怕終有一天, 會同銀行一樣被我淡忘.

2007年6月8日

報失

唔見左野
要去報失
報失之後
就會重現

這不幸的事情今天又發生了...

2007年6月7日

縮一詩

二選一
卻選錯
你遠飄
我待等

亂作詩

兩個選一個
無奈卻選錯
你已遠飄去
我仍待發圍

2007年6月6日

得意忘形

Web 2.0 為我們帶來不少方便, 但有時太方便都未必係好事.

例如我用Google Reader 訂閱 RSS feed 睇 Blog 同新聞. 係好方便, 定時定候自動 update, 睇新聞尤其方便. 我subscribe 明報港台 RSS feed, 本港新聞自動推埋黎.

但太方便往往會令人得意忘形.

有一次見到同事A拎住一份新聞printout, 係一D關於公司既負面報導, 佢準備報告比老闆聽. 我口快快話知道呢單news, 但唔知原來同公司有關.

由於果篇新聞係剛剛先爆出黎, 同事A非常緊張, 懷疑我有內幕, 或者同件事有關. 但實情我只係Google Reader 睇過單news既heading, 連內容都唔係太清楚.

以後都係小心D講野好.

2007年6月5日

股票成交問題

一直都唔明白市况與成交的關係.

升市時如果成交高, 財經分析演員會話成交配合大市, 投資者入市, 係好事.

但如果有成交, 即係有人買有人賣, 買賣股數應該一樣. 有買就有賣, 點解係投資者入市? 話投資者出貨唔得咩?

我覺得無論升跌, 財經分析演員都有辦法自圓其說. 佩服, 佩服.

升職case

最近看見兩個升職case, 原因剛剛相反.

第一個case係隔離部門有高層空缺, 同事A和同事B雙雙報名.

兩個人工作能力差不多. 同事A年資比較長, 但往往算死草, 有好野收收埋埋, 所以在部門有好難代替地位. 同事B年資比較短, 但比較開放, 肯同人地分享自已D好野.

最後老闆升左同事B, 因爲佢覺得可以搵到人代替B. 但因爲A將自己擺到一個好難代替地位, 所以好難搵到繼任人選.

第二個case係大老闆退休, 董事局决定從內部晋升大老闆新人選.

主管C和主管D明爭暗鬥, 爭奪寶座.

主管C和主管D一個主內, 一個主外, 雙方都表現出色. 主管C更是行內數一數二的人才, 根本無可能搵到人頂替.

主管D爲爭奪寶座, 積極部署, 甚至已經指定人選接替自己升職後原來職位.

董事局决定升主管C, 因爲擔心如果升主管D, 主管C會辭職, 對公司影響好大.

結論: 唔好擺自己到一個好難代替地位, 除非你可以擺自己到一個無可能代替地位.

2007年6月4日

寫字樓

一直都好抗拒人地仲叫Office做寫字樓.

其實自從電腦成為Office必需品後, 大家已經越黎越少寫紙. 咁Office仲點可以叫做寫字樓呢? 叫辦公室就啱.

但講起寫字, 我仲係隆而重之, 鍾意用墨水筆同鉛筆, 貪佢地寫字時質感好舒服.

再上路

終於的起心肝, 改名換姓, 再起新Blog.

新Blog會盡量保留原有風格, 即係盡量用中文寫. 但因為用左個新名, 希望可以寫得放D.

再一次希望長Blog長有!