/

2008年12月31日

零八回顧

又過一年,人生都可能過半,越來越唔想時光飛逝。

投資方面是失敗 - 仲差過大市。

由於投資所以零八年基本上是一個義工,尚幸份工仲穩。明年工作上可能有改變,不知是禍是福。

健康尚算滿意,但希望可以減番廿幾三十磅啦!

零八年音語覺得最關注新聞並唔係乜野地震淫照奧運股市,而係香港路上出現很多流浪狗 - 幾乎每單交通意外都係因為流浪狗跳出馬路引起,究竟所為何事?

同聖誕及農曆新年比較,新曆新年可能因為得一日假期,感覺上氣氛無咁熱烈。尤其香港無人唱 Auld Land Syne, 氣氛真係差D。

祝大家忘記零八年所有衰野,零九年有新開始!

2008年12月30日

馬達加斯加二

第一集是在外地一個人無野做Kill Time時看的。估不到咁好笑。

第二集都保留一D第一集笑料連繫兩集,但即使你無睇過第一集都會明白。

除了四隻主角外個阿婆都好搶,充份表現New Yorker 既精神 (在紐約都截到的士,有乜野難到我地?)

90分鐘嘻嘻哈哈好話咁快就過,唔知會唔會有第三集呢?

2008年12月25日

聖誕歌

聖誕節又點可以無聖誕歌? 十九幾年前呢首都算經典喇!

呢首歌歌詞諷刺當年時弊, 依家對照番確係令人感慨;另外,當年霑叔擔住口煙唔夾口型扮唱歌,又真係幾型!

2008年12月24日

聖誕咭

不知是經濟差大家減少不必要使費還是環保份子抬頭, 到今日音語才收到今年第一張聖誕咭.

對於公司亂送聖誕咭, 音語覺得係幾無謂: 尤其係d冇上款下款, 收到都唔知係邊個送黎, 咁不如唔送仲好啦!

近年仲興送電子賀咭, 講真起初第一次收到都覺得幾得意. 但收多幾封發覺千篇一律, 依家都費時開了. 音語寧願收到一封短短幾句電郵好過.

最後, 老套都要講句, 祝眾仆友聖誕快樂, 新年進步. 音語既懶又無乜諴意, 唔一一分別向各仆友寫 email 祝願喇.

2008年12月23日

老香港

音語喜歡看舊照片及影片。

看這些舊片時,音語經常胡思亂想,若有前世的話,音語會否在片中地方生活過呢? 為什麼這些片段在音語眼中這麼親切?

最近看見這段1938年的記錄片,很多地方音語都認得出來,當中音語竟然發現前公司及現公司的所在地!

片中有些小孩子見到攝影機對著他們時紛紛走避。令音語感到唏噓的是,如果他們尚在人間的話,恐怕都七十多接近八十歲了。

Google 廣告




嘩做乜音語個Blog既 Google 提供廣告唔係收數就係債務重組呀?莫非經濟真係差成咁???

2008年12月22日

如此領導

據報憎突叟上京朝拜温總,又攞本記事簿出來扮小學生抄筆記。

身為領導人竟然做d咁既野,簡直不知所謂。

希望今次係佢最後一次咁失禮啦,下次應該換左人喇卦...

--------

救救煲呔
香港脈搏 余錦賢

煲呔赴京述職,滿載而歸,中央政府再提出十四項措施挺港,煲呔總算對港人有所交代了。相比之下,澳門所得到的就不如香港,特別擴大自由行一項,中央堅拒開放,澳門賭業未能受惠,但香港卻可獲更多內地二三線城市的旅客;埋單結賬,香港只有人民幣發債一項尚未得中央授權,皆因此事涉及金融穩定,現在「海嘯」餘波猶在,人民銀行和其他金融監管機構都有戒心,北京一直不願開放得太急,只是香港這邊有不少憧憬,才言之鑿鑿說煲呔述職行可以取得突破。

有關澳門特首,也順便多說二句。何厚鏵上任之初氣勢如虹,不少人把他跟董建華比,覺得此鏵勝彼華,港不如澳,豈料後來發生歐文龍案,震動中央,澳門管治出現重大貪腐,何厚鏵隨時會受中央追究,加上美資大舉進入澳門賭業,令北京更加不安。為了「將功贖罪」,何厚鏵在任滿前全力推二十三條立法,挽回中央對他的信任,看來鏵哥在政治上已過關,但要在經濟領域再拿甜頭,在他任內已無可能。

說回香港。自○五年開始至今,煲呔上京述職已有四次,理應駕輕就熟,視如平常事;可是最令筆者不解的,是他始終戒不掉壞習慣,每次見領導時仍然在「抄筆記」!附圖是內地的《二十一世紀經濟報道》頭版的一張大相,看官有什麼感想?堂堂特首,隨行一大批官員,要做筆記,就吩咐他們做罷,何需特首操勞?有人說煲呔所記是為了「標音」,怕向着鏡頭發言時普通話說得不準,但他跟商務部長、國家旅遊局局長見面時,卻不見低頭做筆記,為了「標音」的說法顯然不成立。

筆者也聽過不少內地朋友說,他們看見香港特首在會見領導人時低頭疾書都不明所以,因為主客會面的開場白都是客套一番、天氣風月,根本沒有值得可記之事;他們認為特首有此動作,一是故意顯示尊卑,一是阿茂整餅,冇嗰樣整嗰樣,有損香港形像。

特首辦諸君,為了香港好,盡早幫煲呔戒掉此一劣習吧!

2008年12月17日

Facebook 十條

1 音語的Facebook 上有116個朋友, 當中有大部份是小中大學同學,其餘亦有親戚,同事及網友等
2 FB 最有用係聯絡失散多年的同學。其中有很多在畢業後已移民的同學竟然都可在 FB 上重遇
3 絶大多數FB的遊戲其實都好無聊
4 用 FB share 相好方便!
5 FB 的 Status 可以作為簡單既日記本,記載每日發生事情和心情等,其他朋友仲可以回應添
6 亦有朋友用 FB 的 Note 來寫比較詳細既日記,其實有D似寫 Blog
7 最難頂係有朋友唔知係唔係公司冇乜野做,係又回應唔係又撘咀,好煩
8 雖然話可以同失散多年朋友聯絡返,但十個有九個都係 add 完就算,從無再交談過
9 間唔中都有d唔識既人想 add 我,音語成日都懷疑呢d人全部都係保險經紀。咁到底 accept 唔 accept 好呢?通常呢d場合音語都係用最正路既做法 : 睇樣
10 報紙話蕭若元批評倪震一事無成,只係成日在 FB 追女仔,音語睇完即時反應係 : 唉,似乎我真係無好好利用 Facebook....

2008年12月14日

市道

市道唔好,除咗越來越多朋友失業外,音語今日仲發覺,原來米報都越來越薄...

咁即係話企業炒咗人後並冇補返人手,咁睇怕經濟有排都未有得好...

2008年12月5日

打折

下列兩間店鋪,你會幫襯邊間?

店鋪A: 五百蚊一對鞋,依家買一對送一對

店鋪B: 四百蚊一對鞋,加一百蚊可買多一對

2008年11月18日

獅子山隧道

記得在音語還是小孩子的古代,沙田還是一個剛開發的衛星城市。去沙田是一件很大的事情。

當時音語因為有親戚搬到沙田,所以音語都有和家人到沙田去。

當時經過獅子山隧道又長又耐,記得爺爺看著手表,然後對我說:「隧道要差不多五分鐘才過完。」

到了長大後,音語駕車過隧道時,大概只需兩分鐘左右便過完。唔同現今的車真的比以前快咁多?

終於今日音語相信又從推輪解開另一個疑團了。

據今日生果報報導,獅子山隧道二號原來1978年才通車。相信當年和爺爺坐巴士時是1977年,因為單管雙線行車,所以限速不是70km/h而是50km/h。噢,不對,當年還是用英制,應該是30m/h。

據報隧道全長1.42公里,如需五分鐘通過,巴士時速應該是17km/h。看來還是太慢。但相信當年車程並不是五分鐘正,可能是四分多,而單管雙程如果多巴士通過的話,車速應該不會太快。所以音語的推輪應該正確。

2008年11月14日

King Kong

又一個童年疑團終於解開了!

音語記得大約30年前睇過 King Kong 呢部電影。電影內容已經唔記得了,但音語記得最尾一幕,King Kong 從康樂大廈跌落黎,跌到隔黎郵政總局而死。

但返查記錄,1976年版King Kong 係在已故既世貿中心 World Trade Center 跌落黎。而最舊1933年版則在帝國大廈 Empire State Building 跌落黎,兩部片都唔係在香港拍攝。

但音語真係清清楚楚記得康樂大廈D圓形窗同跌爛郵政總局呢一幕喎,點解呢?

終於,呢個三十年既疑團今日在上網中無意解開喇!

原來當年音語睇既並唔係外國版King Kong, 而係邵氏出品,必屬佳片既猩猩王!

呢部片原來係邵氏參照1976年King Kong而拍攝,耗資800萬,仲專程去印度取景及邀請日本特撮精英作指導,可謂誠意可嘉。 所搭建既香港街道,尤其係最尾一幕康樂大廈同郵政總局,難怪音語念念不忘啦!

有興趣網友可以到以下 youtube chip 觀賞此套經典電影,特別要留意從7分30秒開始猩猩王爬上康樂大廈呢一幕經典呀!

http://hk.youtube.com/watch?sdig=1&v=KHGUtIAjtoA

最後一提,以下係猩猩王既trailer. 以前D電影片頭露點一D問題都無,相比依家比盲光社D人亂咁攪,似乎香港真係民智越來越閉塞了....

2008年11月6日

本末倒至

在屈銀紙及慢拎的收銀處,收銀員常常會介紹一些特價貨品給顧客。目的是希望顧客在買所需東西後在花少許錢買些本來不會買的物品。

這種銷售手法似乎很有效,所以特價貨品越放越多。但貨品越放越多的後果是越放越檻。

例如今日音雨到屈銀紙買兩排香口膠,收銀員竟然問:「先生有無興趣買焗油用品呀?今日特價$299咋!」

兩排香口膠十幾蚊,竟然要搭單買$299焗油用品呀?誇唔誇d呀?太本末倒至了....

2008年10月31日

十月結

好耐無寫月結,但十月真係一個恐佈月份,所以要寫低留為記念。

在本月音語投資組合終於入肉。在動盪既十月音語亦試過手痕撈底,但幸得高人hana指點賺些少即刻閃,否則蝕得更甘。

長線組合七隻股份只有三隻有錢賺。雖然依然跑贏大市5%但只係表示蝕少5%, 都係蝕得好甘。幸好全部都係實力股有息派兼唔會去賭accumulator, 所以都仲可以守下。

展望黎緊大市恐怕係一浪低於一浪,即是無咁差都只會係L形橫行,急升應該無份。唯有睇下有無機會放咁些少輸少當贏,然後趁再跌重組個組合啦。不過恐怕都唔會升到一個位音語覺得值得走,所以多數都係keep住D蟹貨走唔甩了。

2008年10月19日

蕭條?

音語本住“蝕左去不如食左去“精神,尋日同家人到一家都幾貴既餐廳食晚飯。

呢間餐廳出左名大排長龍。滿以為金融風暴大家勒緊褲頭,應該唔駛等位啦,點知餐廳仲係好生意,足足等左個幾鐘先有得食。

咁其實經濟係唔係咁差呢?不過條街就真係好似少左人就真...

2008年10月6日

撈底

始終都係死性不改,又嘗試撈底,結果當然係買得太早。

既然明知在最低位入市係絕無可能,咁點解唔等止跌回升先買?答案係抵唔住升左後先入好似唔係好著數呢個心魔。

長線來講其實在低點前後買分別不大,不過跌定先買應該穩陣D, 最多係升得太急追唔切。

音語見今日又跌其實心郁郁又想撈底,希望出完呢篇可以警惕自己忍下手啦,得兩三注資金淨咋,要小心D呀!

2008年9月22日

債券

見到雷曼兄弟債券出事,音語想起也買過類似產品。

應該是大概零四年的時間,當時有一隻"債券", 標榜如盈富基金掛勾,如盈富基金高於12000點每年可獲七厘息。音語膽粗粗買了五千圓美金,為期五年。如跌穿14000點利息將會減少,至大概12000點則無利息。

由於過去幾年恆生指數基本上是向上,所以音語每年都坐享七厘息。可能是發行商覺得年年付七厘息唔抵,所以舊年一過限期立即將"債券"贖回。

已經忘記此"債券"是否雷曼出品,但無論如何相信今次應該是執番身彩了。贖回後埋單計數,由於期間恆生指數上升,如果音語當年買盈富基金,計埋利息應該比買"債券"所賺更多。

音語後來發覺,此類產品,如Accumulator, ELI 等,大多是有些少甜頭俾買家,但利潤多數會有一個cap, 相反下限則是無底深潭。而且此類產品越出越複雜,音語對此類自己不太明白的產品是不會買的。

2008年9月8日

賽後檢討

音語配票成功,踢走菜菜子!

音語保持自己記錄,投邊個邊個就輸!

最高興是梁耀忠成功當選。雖然政見不同但梁是少數音語推崇的議員。

最失望是田少落選。或者如hana般識睇相及理性的選民太少吧。

最期望睇到毓民,長毛同謝偉俊攪局。話晒音語都投左阿法律超人兩屆架。(唔知係唔係俾音語邪死,要走到旅遊界先選到呢?)

備受扑界推崇的方卓如選舉失敗了,而且輸得幾多。

音語都係數豆界中人,掹車邊亦同卓同一組職,四年前亦有投卓一票,但今次最終都係決定唔投卓,而導火線是一場選舉辯論。

辯論中卓被另一候選人針對,但卓沉不住氣,跟對手對罵,詳情可自行上youtube尋找。而就是經此一役音語決定不投卓。

又有傳聞卓參選是要幫波記撬走香姑的票。音語不知此消息有幾真,但如果是真的話卓可算是任務完成了。希望只是傳聞啦。

起初音語以為卓會是第二得票多。但以卓人氣之高音語對他所輸票數真是有點諤然,或者大部份讀者都不是數豆中人吧。至於四年後卓能否捲土重來,就要看他做化了。

又,點解無人打黎同音語拉票既?係唔係音語一票無乜作為呀?

2008年9月7日

投票

感覺好似好多人投票,要排好耐先有得投,唔知點解投票率咁低.

今日有個不知明missed call, 應該係工會吹雞。

功能組別又話兢爭激烈,都無人打黎拉票,失望。

投完票有個唔係港大調查員訪問,但一來唔知係邊間二來趕時間,所以無理佢。

初步睇音語配票有可能成功,希望聽朝有好消息。

2008年9月2日

配票

今屆垃圾立法會雖然是有史以來最多人參選,但氣氛之淡薄亦相信是有史以來最差。

雖然人多但重要議題鈔唔起,音語亦無個候選人選得落手。

在如此情況底下,音語決定玩配票。

話說音語選區內,泛民及親中皆各穩奪兩席; 剩下兩席則競爭激烈,而音語極不希望某大黨的名單排行第二的候選人可以當選。

根據傳統智慧,本區內泛民及親中票源約六四比。換句話說,若親中兩張名單票數相約,則很大機會兩張選票皆剩餘票數不足以取得一席,兩敗俱傷。

因此,音語決定將神聖一票投給極具爭議性的"獨立人仕"。

當然音語亦知道黨的動員力量是多麼巨大,但既然揀無可揀,音語相信這樣投票是最適當,亦可貫切音語一直不投政黨的取向。

至於音語的另一票功能議席,音語亦是揀無可揀,相信會投廢票以表達對此制度的不滿。

2008年8月28日

比利時四眼妹

今屆奧運曲終人散,不知何故音語對比利時的跳高選手 Tia Hellebaut 非常著迷。

跳高賽事於閉幕前一晚舉行。賽前克羅地亞選手是大熱門,而賽事克羅地亞選手亦一直帶前,每跳都一躍而過。直至2.05米,Tia 第一跳便成功兼平個人最佳成積,相反克羅地亞選手則首跳失敗 - 此一跳亦成為了金銀牌的分野,Tia 幫比利時奪得今屆奧運唯一的金牌。



後來音語上網翻查資料,原來 Tia 本來是七項全能選手。但因為膊頭受傷不能擲標槍,所以改為專攻跳高。可能真是塞翁失馬吧。

到閉幕禮,音語赫然發覺 Tia 為比利時擔大旗手。Tia 真是實至名歸。

至於 Tia 有甚麼值得音語著迷?我想應該是她戴眼鏡跳高的英姿吧。

2008年8月15日

洛杉機奧運會

原來已經是二十四年前的事了.

那年可能是本港第一次電視直播,年少的音語每天都會在電視旁觀看奧運。

無數熟悉的名字,如 Carl Lewis, 許海峰,李寧,中國女排,Edwin Moses, Daley Thompson等, 音語都是從此屆奧運開始認識。

但在此屆奧運之後,一切都變得不同了。

2008年8月7日

香港隊,加油!

加油加油加油加油加油加油!

2008年8月5日

立法會

每當講完有關立法會事情後,都有下列一段野:


本選區其他候選人包括何月娣 陳步禮 吳縣濟 倪淑輝 司空敏慧 蛇共蟻 劉並蒂 神合體


真無聊...

2008年7月22日

一年容易又書展

今年書展有乜好介紹?緊係呢本啦!

今集書號乃紅出版Blogger 004 , 封面係出至X.per.Xr 及 微軟詩人手筆, 內容係收錄渣蛇去年四月至今年五月作品,全書共260頁, 比上一集略少8頁。


最神奇係本書雖然比上集略少8頁,但可能係潮流興瘦身關係,本集竟然薄左約30%!

至於內容方面唔駛講緊係正啦。多謝渣蛇再賜書,音語會好似上次一樣,再買一本送俾知音人。

咪話音語唔通知,快手到書展買番本呀,蘇州過後無書睇呀!

2008年7月17日

萬眾一心

原來香港人真係好愛國同愛憎突手。

早排習總訪港叫憎突手攪好奧運,為左表達我地既決心,幾萬香港人冒住日曬雨淋兼俾雷劈既危險,都要出黎排隊買奧運紀念鈔票。相信大家都係為左攪好奧運氣氛而並非炒買套利。

相反澳門就遜色好多啦。澳門政府竟然容許市民網上訂扣及俾澳門人優先購買,所以街上一D氣氛都無。

今鋪我地香港贏返鋪啦,Yeah!

2008年7月15日

逼遷

死左一條魚,有乜理由中共會送多五條落黎,攪到依家有成九條咁多... 仲要逼鯊魚走添...

最初又話五條代表奧運五環,咁家下九條又代表乜呢?九章落地?

嗯,音語諗今鋪又係中共想跣憎突手一鑊,九條再有一條瓜左就要佢落台... 睇黎唔駛奧運閉幕我地康港都有新突手了。

講返逼遷,有無人幫下D可憐既鯊魚,為佢地爭取權益呀?咪話音語唔通知,就黎選垃圾會,眾候選人快D出手啦!

又,如果死左一條魚可以多得五條,咁死下死下香港咪遲早通街都係魚??

2008年7月7日

兇兆

習總訪港,先有尋日奧運滙報會豆腐渣工程跌條喉落黎條條fing,再有今日家訪送禮比人跌爛左隻杯,莫非...

2008年7月5日

又唔見一百九十四大元!

前幾日信報網站開張,音語同怒火眼睛兩人都率先貢獻咗三百八十九元以優惠價訂閱一年。點知,今日音語竟然收到一個屬會既“內部”offer,可以超優惠價一百九十五元訂閱!當堂bea一聲!

不過算啦,都好難有本地報紙可以叫音語比錢上網睇喇,音語覺得係信報先值。況且音語上得網睇就唔會再買報紙,一年都慳唔少錢。

不過希望屬會第時有筍野早d down聲就好喇。

2008年6月25日

死魚

海洋公園死左一條魚,攪到滿城風雨。

本來死條魚係無乜大不了事情,但據說條魚係國寶,咁就大件事喇。

睇番轉頭熊貓來港時海洋公園都特登起個熊貓館比佢地住,咁家下五條魚黎都好應該起返個鱘龍館先得啦。

既然呢件係件大不了事情大件事, 在起好鱘龍館前,海洋公園應該將所有魚由海洋館移走以安置國寶,以免再為憎突手添煩添亂加速佢落台。

咁其它魚點算?既然佢地都唔係國寶,咪求其安置到梁顯利,費事佢地通街條條fing咪得囉。

2008年6月21日

眾人皆醉

星爺的電影當中,音語獨愛回魂夜。回魂夜的中心思想是,眾人皆醉我獨醒。

當你相信自己做的是對,又何需理會別人說甚麼?有無啦啦隊是不會影響結果的。

不同意見人仕,只要他們是堅信自己理念不轉軚,音語都會敬重的。

畫公仔畫出腸: 唔信一個人並唔等於「攻擊」、「冤枉」或「誣衊」,話人狗眼看人低亦未必真係將人比同狗,可能只是詞不達意罷了。對方盛怒之下所講的任何東西都可能是未經大腦,不應當真。音語經常都在盛怒之下亂吠被人針對,所以現在索性乜都唔講。

2008年6月10日

魂斗羅

大家幾得呢個遊戲嗎?魂斗羅有一個秘技,原來只要你在Google Reader 打,會有一個隱藏人物出現。

吓,秘技係乜野?咪 上下下左右左右BA 囉!

2008年6月1日

年結

366日內出126posts, 即2.9日1個post.

用得最多tag係"程音語", 其次係"日記", 第三係"晴陰雨".

最受歡迎post竟然係呢個

此外,本扑在Google Reader上竟然有13人訂閱,麻煩訂閱了的朋友留低大名好嗎?

2008年5月28日

撤職減薪

今日報紙頭條,豪門爭權,大佬被撤去主席兼行政總裁職務。報紙強調改任非執行董事後,薪酬隨即大減,將由去年年薪 206萬元,減至每年10萬董事袍金。 報紙筆調好似前主席俾阿媽罰,扣零用錢咁。

但前主席真係靠年薪過活嗎?206萬元定10萬唔通對佢生活有分別嗎?

我諗最大分別係10萬年薪唔駛交稅。

2008年5月25日

三週年

三年前今晚
火鳥重生
感動

2008年5月3日

香港又輸...

呢兩日港澳兩地分別迎接火棒,香港再一次輸比澳門。

首先澳門站的氣氛比香港不知好幾多倍:市民可以近距離面對速遞員。相反香港市民同火棒隔幾丈遠,真失敗!

其次,澳門最年長速遞員何爵士老當益壯,自己跑唔駛人幫;相反香港之寶阿憎人大後生何博士十幾歲竟然要勞煩中南海保鏢推佢,真係令香港蒙羞呀...

三來,人扒龍舟我地又扒龍舟,但火棒在香港竟然熄左兩次, 簡直係傷盡香港同祖國十三億七百萬人既心呀...

唉,香港又輸...

2008年4月29日

絕妙設計


好急呀!

2008年4月28日

火棒員

聽日開估。

萬一被選中人士真係聽日先知,會唔會練唔切呀?萬一跌左火棒我驚會俾人抄家,又或俾人話賣國賊呀!

2008年4月25日

仲有七日...

仲有七日, 香港就接火棒啦。但香港點解都仲係無乜氣氛既? 小心有辱國體呀!

呢幾日火棒交接都好順利,所以無乜好講,但聽日在日本會唔會有野睇呢?

又,據說藍衣人非常盡責,當火棒傳送員跑得慢或揸火棒太低,令至電視影唔到時會主動呼喝提點傳送員跑快d或揸高D。咁香港D尊貴要快D練氣舉掗拎喇! 唔知藍衣人會唔會幫憎獻錢推車等佢行快D呢?

2008年4月18日

神威賽車手

昨夜,音語和肥龍鍊左幾轉車。

龍哥不愧為GT-R高手。手起刀落,音語直落連輸三場。

到最後一場賽道是音語強項,音語以為可以破蛋無輸得咁慘,點知...

比賽可謂緊張刺激,雙方互有領前。到最後一個彎音語仲帶離幾個車位。點知龍哥在最後彎角好靚咁偷個內彎,咁就過左頭。四場贏晒,佩服!

如果大家有興趣同我地鍊番轉的話請到肥龍處登記。

2008年4月17日

戒嚴

嘩,印度玩戒嚴呀,所以火棒又成功運送啦,好野!

聽日到香港玩傳送火棒遇襲預習,其實突區政府應該向印度學習,聽日放假一天啦!

又,到正式傳送火棒時火棒將會經過音語公司,到時如果突區政府唔放假,公司都應該放我地一日假啦,安全第一嘛!

困獸鬥

巴基斯坦站又創新猷,據報整個過程係在體育中心內進行。

困獸鬥既好處係保安嚴密唔會出事,壞處係玩唔得耐。

睇黎突區政府都可以淨係於大球場跑一個圈就掂。但問題係120名火棒傳送員, 一人只係跑得幾步可能唔夠喉喎...

2008年4月15日

茶水

開會安排茶水其實係一門學問。

就以音語以前公司為例,當有別的公司高層到來開會,秘書們都會大費周章安排茶水。例如A先生喜歡冰水, B先生喜歡咖啡少甜,C小姐喜歡西茶一粒糖唔加奶等,秘書們都需要寫清楚給茶水阿嬸預備。

如果是"熟客仔“秘書只需寫低該人仕名稱茶水阿嬸便會知道該預備甚麼。然而有時如果有生面口,那秘書應該怎樣做茶水阿嬸才不會弄錯呢?

音語曾經在pantry見過一張黃紙寫下以下內容:

蓮姐:明天8:30會議室開會:
鬼佬:咖啡少甜
唐人女士:冰水
金絲眼鏡:奶茶少甜
其他:熱水5杯
茶3杯

2008年4月13日

無驚無險

火棒深入東非,無驚無險完成第一站。據報比預期時間早一粒鐘收工添。莫非d傳送員驚俾人打/老笠/噴水所以走得快d?

睇黎呢個方法可以幫我地偉大祖國選手跑快d奪取多幾個金牌喎。

2008年4月12日

血肉長城

阿根廷站有過氣無品球王放飛機(驚扭唔過d火棒衛士乎?) 又有擲水彈火棒衛士組成血肉長城擋住,但總括來說可謂無驚無險。

下一站會係坦桑尼亞照計大家友好國家唔會亂黎卦?

2008年4月10日

由於時間關係

今站玩“由於時間關係,火棒已經傳完啦。”

咁樣做好處係可以避開反對人士,但壞處係連支持人士都被迫白行一趟。不過既然係支持者就應該以大局為重唔好嘈啦。

咁落去可能聽日會話“由於時間關係,火棒已經黎到香港啦。真突手快d去接火棒啦!”

2008年4月9日

火棒

關於接火棒遊戲,音語有以下疑問:

1) 各大城市是否在鬥快整熄火棒?

2) 據說接火棒遊戲將會取消,咁各大城市所花使費,如搭台保安等會否有得回水?

3) 萬一火棒被人老笠,奧運會否如期舉行?

4) 話時話我國咁多假野,其實家陣傳緊果支會唔會係假野黎架?

2008年4月7日

熄火

話口未完,奧運聖火在巴黎已經被熄滅四次。

歷史上咁多屆奧運會聖火只是因惡劣天氣熄滅了兩次,想不到今屆咁快就打破晒所有紀錄。

距離八月八日奧運聖火傳到北京尚有一段好長的路要走,咁落去唔知會唔會好似電視劇輪流轉咁呢?

又,音語一直以為聖火傳送係廿四小時不停咁接力,估唔到原來係每個城市係咁咦跑幾個鐘就算,然後搭飛機到下一站。

咁樣甩甩咳咳跑法真係....

2008年4月6日

四月雪

想不到四月英國還會下雪。

而在下雪的一天,奧運聖火亦運送到倫敦。不知是否有甚麼含意?

和以往不一樣,不知何故,今屆聖火是由希臘先運到北京然後再在世界各國走一轉再返中國。是中國人太心急的原因,所以要先到中國嗎?

倫敦的聖火傳送可謂別開生面。除了預期的示威外,更有人企圖奪取聖火及用滅火筒撲滅聖火。 而偉大的祖國為了保衛自己政權的尊嚴聖火更派出保安人員保護聖火傳送員。

到了五月二日,聖火將送到香港。這將是繼1964年東京奧運之後聖火第二次到香港。屆時世界各地示威分子將會把握此機會,而特區政府將會嚴陣以待以免出醜。據悉香港很多尊貴的達官貴人及明星都有機會傳聖火,相反運動員由於成績未如理想關係,只有少數受到賞賜獲此機會。

至於外國會否杯葛奧運會?音語相信不會。是因為奧林匹克精神?唔好講笑啦。一眾體育大國的運動員受了這麼多贊助,若然杯葛奧運贊助商一定同你死過要你賠錢。更何況若然要表達政治立場,最佳位置不是頒獎台上嗎?相信沒有人夠膽腰斬播國歌吧?

敘事

對於敘事,音語一向比較鬆散。

例如很多人敘述一段對話時,都會非常巨細無遺地把每個人每句話都重覆下來 - 有些人甚至連每一個人的語氣都模仿下來。這個方法的好處是聽眾可以好像案件重演般知道事情的發展經過,但壞處便是所花費的時間太多,甚至乎很多時其實會花事間在聽一些無關痛癢的對話。就像音語的老闆,很多事敘事都喜歡從頭開始,又經常不經意地會岔開話題,所以和他開會往往會花很長的時間。

至於音語則沒有這個能耐,往往都是只把重點表達便算。好處當然是省時及可以一語中的,但壞處則是很多時都會遺留一些要點沒有敘述。

看來怎樣敘事是天生的,音語是改變不了這個習慣的。

2008年4月1日

舊愛新歡

和你相處八年後,今天終於要與你分別了。

這八年來你帶給我的歡樂,我是不會忘記的。

即使我有了新歡,但若然許可的話,我是希望可以繼續和你一起的。只可惜,我實在是負擔不來。

但,我相信我是給了你一個好的新歸屬,相信你會比跟我一起更好。

今天舊愛新歡有機會共惹一爐,不知來日還會否有此機會呢?

2008年3月29日

大鄉里遊記

在剛過去的復活節長假期,音語到過威尼斯一遊。噢,應該是威尼斯人。拉斯維加斯?我都想,是澳門的威尼斯人才對。

若果要用三個字來形容威尼斯人,音語會用以下三字:

大 。多 人 。

是假期的原因吧。由香港坐船開始到酒店check in 以至食早餐,到處都是多人。多人到要排隊食早餐 (那一刻音語想起三年零八個月時排隊拿米票,或者這就是中國人的宿命吧...)

威尼斯人大就是意料之內的。除了大之外就是堆砌出來的假象,令你在food court都可幻想是置身威尼斯。Gondola的外籍船夫可謂敬業樂業了。不論男女都大力撐船及唱歌,而且水準不錯。

酒店內的告示很多是簡體字,而服務員中很多是身裁高挑的講國語少女。酒店的目標顧客是誰真是不言而喻了。

威尼斯人的重點當然是賭場。可能賭廳真是太大吧,所以音語覺得人不算太多。但正因為不太迫所以賭得暢快。結果音語輸左好多....

百二蚊! 成個月報紙錢呀!

總括來講今次short trip 都算暢快,除左行到跛之外。下次有機會都會再來,希望贏番d報紙錢。

2008年3月27日

奇蹟

今日音語因私務煩忙,整日都忙得一頭煙。

其實總共有三件事須要完成,Task A 和 Task B 需要明天前完成, 而Task C需要下星期三前完成,但最perfect是星期三該天完成。

早上十一時,音語在努力完成 Task A 和 Task B,而 Task C完全沒有起色。

下午四時,Task A 終於完成,而 Task B 亦終於安排好,明早應該可完成。

接著是最麻煩的 Task C。幾經努力及高人怒火媽媽指點,音語終於靈機一觸,於下班後約八時安排好。最重要的是可以很完美地在星期三完成。

希望黎緊幾日順順利利無阻滯。

2008年3月21日

有競爭有進步?

好多人話有競爭有進步,
而在競爭下消費者最終會得益。
聽落好似好有道理。

但點解兩個收費電視台競爭咁激烈,
消費者竟然會蝕底要俾兩份台費呢?

究竟係競爭未夠激烈所以電視台可以bundle一些消費者不需的頻道,
還是競爭太激烈所以電視台可以各勝一仗呢?

在這情況下音語寧願少些競爭一個台播晒波,
又或者政府作出干預維護消費者。

報紙

最近音語作出一個決定,停止訂閱一份已經看了差不多十三年的報紙。

最初開始閱讀這份報紙是因為它的副刊。這份報紙亦不斷改進及創新,所以音語一直支持。有時發覺報紙某些觀點有問題,音語亦會寫email去投訴,亦曾經有有記者回電音語了解音語的問題。

直至最近幾年政治大氣候轉變,這份報紙亦慢慢轉軚。再加上該報為了爭取銷路,財經版亦馬經化,專門提供號碼給讀者鼓勵讀者短炒。這都是音語不想看到的。

一份報紙其實好像一個要好的朋友,每日都與你相見。其實音語想停止訂閱已經有差不多一年了,但音語一直都在等,希望有奇蹟出現。最近終於狠下了心,在半年的訂閱期過後決定停止訂閱。

有網友對音語說過不喜歡現今報紙壁壘分明,大部份親中而少數反中,只有部份免費報紙才比較持平。音語對此並不同意。音語覺得這個世界是沒有持平,只有報紙的取態是否和你的取態配合而已。若然一直看的報紙改變觀點立場,那便是想想是否再付款支持它了。

2008年3月19日

中招!

放心,音語唔係中感冒病毒。

話說早幾日音語msn有朋友突然send 個 website link http://email.pics.srys.info (email 是他的msn login). Click入去後該網站就叫音語用msn account login.

音語以為朋友係想俾佢最近旅行d相音語,唔為意下就login了。點知login後無野睇,音語於是便logout。

奇怪的事就發生了。最近幾日音語msn經常自動logoff, 音語突然醒覺,可能該網站係spam, 所以連忙改password, 希望無乜損失啦。

各位扑友小心中招呀。

2008年3月16日

新挑戰

經過半年悠長假期,你終於再開始新挑戰了。

面對新挑戰雖然你有點緊張,但你要相信自己,俾d信心自己就掂。

I know you can make it.

2008年3月9日

最近忙到抽筋,轉眼已經成二十日無寫扑了。我諗同肥龍兄停扑既時間都差唔多咁長。

雖然話忙但其實都可以間中寫幾隻字post幾段youtube, 但最大問題係工作壓力大。

最近音語竟然試過兩次銀行Overdraft三次出車唔記得拎泊車證及無數次開會帶漏/帶錯野兼且經常講粗口,可想而知幾唔掂...

然而凡事都可以有兩面睇。音語因為忙所以最近體重有所下降。音語可以大膽conclude減肥係唔需要節食做運動既。只需足夠壓力就得。

呢種超壓力生活睇怕要到復活節先完,希望到時音語可以復活啦。

2008年2月19日

夢境裏的時間和現實的不同。

試過很多次音語睡到一半突然驚醒,隱若覺得夢裏過了很長的時間;但一看鬧鐘,原來只是過了半個小時。

很多時音語也會胡思亂想,這一睡究竟會不會醒?若然一睡不起,那音語是否應該死撐不要睡著呢?

音語還記得, 小學四年級開學的第一天,音語帶著睡眼惺鬆上學時,曾經想過是不是還在睡夢中尚未起床。若然是這樣的話,那現在究竟是夢中還是現實呢?

想下想下,音語想到有點莊周蝴蝶的意味。或者音語是有點累,想得太遠了。

然而,當遇到不高興事時,最重要的是不要鑽牛角尖。睡醒了又是新的開始,總會苦盡甘來的。

2008年2月18日

校際音樂節

在遙遠的一個小城,這一天是校際音樂節比賽。孩子代表學校參加比賽。

孩子十分喜歡彈琴。每天都自動自覺練琴。為了這次比賽,孩子更加緊訓練。和上次比賽比較,孩子的確有進步。

這天有五十多個參賽者,但水準非常參差:有些拍子全錯,有些音調不準,更有些竟然可彈高八度。在這群參賽者中,孩子明顯鶴立雞群。

最後孩子的努力沒有白費,順利奪取冠軍。

父親十分高興孩子可以得到冠軍。雖然奪冠是有點時勢做英雄:若然對手強頑,孩子是未必會得到冠軍的。但父親最感到欣慰的,是孩子為了比賽而肯付出努力。雖然現實社會付出幾多未必會得到幾多,但曾經付出過,至少都對得起自己。





後記:這是程音語的晴陰雨第一百篇。湊巧可寫這題目,實屬天意。

2008年2月17日

迷信

雖然好似好白痴,但有時想唔迷信都唔得。

音語發覺當我每次見到某樣野時,都會有不幸降臨。

本來呢d野應該係無乜科學跟據,但當一而再,再而三,同樣結果發生十幾次,你想唔迷信都唔得。

情況就好似買大細連開十鋪大,咁你仲敢唔敢買細?

有無人可以教我點樣破解呢個魔咒呀?

不過諗真d其實所謂科學跟據係乜呢?

好似有d科學家話飲㗎啡有害,但有d就話有益,個個都成大堆研究報告好似好有科學跟據,咁信邊個好呢?

會唔會其實音語既魔咒表面上雖然無乜跟據但其實係有,只不過係人類未領略到呢?即係好似蝴蝶效應咁呢?

無論點都好,都係呢句,有無人可以教我點樣破解呢個魔咒呀?

2008年2月14日

情人節

情人節是一個商業味很濃厚的"節日"。

如果公司多女仔而大部份都有收花的話,若果你無花收壓力都幾大。

音語今日非常繁忙,唔係太多覺公司好多人收花(一兩個卦,真係無乜留意...)

但今日音語竟然收到三粒朱古力仲有一件餅!真係喜出望外!

需知道日本女仔係習慣於情人節送朱古力比鍾意既男仔。如果男仔係有意思的話係會在三月十四回禮。

咁音語係唔係好威呢?

實情係,音語收到朱古力之中兩粒係同事大圍送比全公司男男女女既,件餅就係散水餅。

淨番一粒朱古力就真係淨係送俾音語架,都算巴閉卦?

咁究竟係邊個咁好淨係請音語食朱古力呢?

答案就係油站入油個呀嬸囉,仲有coupon送添呀,係咪好正呢?

2008年2月11日

oh no

網上世界真係乜到有... 音語竟然搵到個廣告....

救....命....

2008年2月8日

新年

人越大,就越覺得新年氣氛越黎越薄弱。

以前細個過年都會偷雞燒下炮仗,出街十間鋪頭九間都休息(仲要係休好多日添),報紙又收爐初三先出番,跟屋企人拜年都會拜到新十五,但依家呢?

炮仗?好耐無玩又無聽到人玩了;休息?好多鋪頭初一都開門喇;報紙?初一都照出啦(仲要係大吉利是擺鹹相頭版都唔知搏乜);拜年?初五都返工啦仲邊有時間呢?

之但係雖然越黎無新年氣氛,但有一樣野到今時今日一過年就出現黎應下節,就係賀年廣告啦。

以前煙草商每年都有一個好大堆頭好好睇既賀年廣告,但自從香港禁止賣香煙廣告後,我地已經好耐無得睇呢d高質素大堆頭廣告啦。不過我地仲有得睇d賀年分類小廣告。

呢類廣告通想都係得幾秒鐘,主畫面係一個靜止畫面,有賀年音樂襯托在背景,然後報幕員會讀出公司名稱及祝福語;亦有一類比得起錢既客戶會拍一段短片令到個廣告無咁寡。

唔知點解,今年音語經常見到一個某強積金既賀年廣告。主畫面係三個人,中間一個老外左右兩個四眼唐人,相信係該公司既高層。一開始係老外講「kung hei fat choi」,然後左右兩位講左段大概係XX強積金公司祝各位客戶新年快樂既祝福語。要注意既係,一路講三位高層係一路打恭作揖架!(當然係淨係上半身兩隻手郁而無彎腰啦)

音語心諗,拍呢個廣告究竟為乜呢?如果係為左同客戶講祝福語,老實講音語睇左六七次都唔記得間公司名,可想而知呢類廣告既效力有幾強;再加上如果我係你強積金客戶既話老實講我真係識你地三個高層係老鼠(又幾應節喎 ^_^ )音語認為呢個廣告既主要目的可能係要滿足高層既上鏡欲。原來強績金d服務費收咁高係咁樣浪費用架啦。

呢類廣告由於數量太多兼個個差唔多所以都幾難入腦。但以下呢個可謂係呢類廣告既經典。做左十幾二十年都年年播返都得。



簡單直接。到Point應節。多一個字嫌多少一個字嫌少。掂。

(後記:嘩啱啱出完呢個post竟然於本扑左手面既Google Ad見到果間強積金公司廣告,救命呀!)

2008年2月5日

師爺

公司有位師爺。

師爺是公司老臣子,在蔽公司工作十多年,經驗豐富,善於揣摩大老闆心意。亦有同事稱他為世界仔。

師爺有兩個強項,分別是射波及邀功。

射波者,卸膊也。

師爺的卸膊可謂全方位。向上(自己傾唔掂數/唔想做就幫老細安排和別人開會)橫向(和同級同事開會恃熟賣熟指其他同事做事而自己「做協調工作」)及向下(自己應該做的事不做而委派下屬去做)均達到爐火純青。

至於邀功方面,最近音語不幸中招。話說一次跟大老闆匯報業績時,由於音語和師爺的老細講得一舊舊關係,師爺即時把握機會打斷老細,自行跟大老闆解釋。

本來這樣做其實無可厚非。但問題是師爺是拿著音語預備的文件跟大老闆解釋去邀功。

只可惜文件不是師爺預備,令到師爺解釋錯誤,最終都要音語出馬才解清大老闆疑問。經此一事,音語相信大老闆會覺得我們這組人準備不足及非常混亂。

看來下次匯報時音語都要小心自己的文件外洩及更加詳細地brief老細了。

2008年2月4日

立春

時光飛逝,不經不覺,繼半年前寫立秋後,今日已經係立春了。

踏入立春其實係一年之開始,在此音語向眾扑友拜個早年,祝大家鼠年進步,身體健康,步步高陞,心想事成,豬籠入水,學業進步,蜜運成功!(以上祝福語麻煩大家對號入坐)

適逢今日又係年廿八,大家幾得要洗邋遢,洗晒d唔好野然後去過一個美好既鼠年呀!

2008年1月29日

薄如紙

究竟早幾日既輕薄廣告歌係買乜野物品,答案咪係呢樣野囉,薄到... 好似一張紙咁薄。仲要有DIY版添!

2008年1月27日

騙案

這是一宗騙案。

音語家附近茶餐廳林立,最近亦有一間新開張。

對於新食肆音語都會去嘗試,這間也不例外。

這茶餐廳走比較高檔的路線,堂食竟然要加一。為了節省那一個幾毫,加上今日天寒地凍懶出街,所以音語決定叫外賣,怎料就此出事。

首先,由於人手關係,兼且天氣寒冷多人叫外賣,負責人說要等一小時才可送貨,於是建議音語自行到來拿取。

到付賬的時候,音語發覺茶餐廳所收的錢一百三十圓和音語跟據外賣紙計算的九十多圓相差三十多圓,經查證後,茶餐廳負責人說原來外賣紙上的價錢是午市特價 ﹣ 事實上外賣紙上亦有一行細字註明的,不過因為字太細小加上沒有列明晚市外賣價,所以音語沒有留意。再加上外賣飯盒每個收你一蚊,所以便和音語計算的有出入。

既然如此音語亦只好被迫受騙。只是如此做生意,音語再也不會光顧了 - 即使它的食品水準其實不錯。

音語一向覺得如果餐廳食品出色的話,自然會多人到店鋪光顧。既然外賣不會佔據店鋪位置,可以令店主在不須擴展店鋪面積之餘可增加生意, 是沒有理由加收一圓一個盒的。坦白說若果店主在外賣的份量上減少,客人是不會發覺的。但收盒錢實在是太小家了。

事後再想其實音語知道價錢差別這麼大之後其實應該立即掉頭走的。看來音語的應變能力依然非常差,仍待改進。

2008年1月24日

輕 . 薄

呢首歌“了騷“乃一件最近非常輕薄新產品的廣告歌,令人感覺非常舒暢,而主唱的以色列歌手 Yael Naim 亦因而一炮而紅。

係乜野產品?唔駛講到咁白掛?。

I'm a new soul I can do this strange world hoping I could learn a bit about how to give and take.
But since I came here felt the joy and the fear finding myself making every possible mistake

la-la-la-la-la-la-la-la...

I'm a young soul in this very strange world hoping I could learn a bit about what is true and faith.
But why don't please trying to comunnicate finding just in love is not always easy to make.

la-la-la-la-la-la-la-la...

This is a happy end cause' you don't understand everything you have done wise everything so wrong

this is a happy end come and give me your hand I'll take your far away.

[Refrain]:
I'm a new soul I can do this strange world hoping I could learn a bit about how to give and take but since I came here fellt the joy and the fear finding myself making every possible mistake

la-la-la-la-la-la-la-la...

la-la-la-la-la-la-la-la-la-la....

2008年1月23日

大時代

若果你最近兩日大昏迷,或者好似老餅咁搭緊飛機,聽朝起身睇下股市,可能會以為最近兩日個市無乜點郁。

但實情係我地已經經歷左一次大規模既財富轉移。

一落一上,成交咁大,究竟有幾多人蝕到趴街,幾多人搵多幾世錢,真係天知曉。

老套D講句,音語都係覺得買股票應該係要抱住長線投資心態。好多報紙都有長中短線推介,但佢地既長線真係長到得人驚 ﹣ 音語見過有報紙既長線推介竟然係三個月!而呢份仲要係財經報紙添!(話時話報紙其實都可能有利益衝突。話晒如果市道旺緊係會多人買財經報紙啦,咁佢緊係要叫人出貨入貨多D架。)

音語既長線投資係要揸十年以上甚至乎係要揸過世。呢D股票通常都係比較穩建及在行內有領導地位,長線一定向上。短線升跌其實並唔重要。跌市反以係增加資產既良機。音語亦有趁此良機“溝濃“D股票。

音語並唔係講風涼話,但如果你仲年輕蝕下錢交下學費可能係好事。起碼你仲輸得起,至緊要係識得檢討犯左乜野錯(通常係衰貪心)下次唔好再犯。

2008年1月18日

應變

時間:無聊會議進行中
人物:一群困獸加茶水阿嬸
地點:會議室內

開會開了幾個鐘了,大家中場休息揸揸水之際,有人call茶水部阿嬸換茶水。

會議桌上放滿了文件及電腦,沒有多餘地方。

茶水阿嬸發覺沒有地方擺放水杯,突然靈機一觸,隨機應變,將其中一部開著的notebook computer 的 lcd mon 關上,然後將水杯放在電腦上。

一眾困獸看到眼凸。

幾時都話茶水阿嬸係惡晒架啦!

2008年1月11日

生日快樂

點首歌俾今日三條一生日既網友,都係果句,留意歌名及歌詞。新一年抹晒d衰運呀, 繼續撐你!

命運我操縱
作詞:林振強
作曲:倫永亮
編曲:倫永亮

狂歡 喝彩恭祝今夜我新生
現在我終可操縱我命運
今天不會再為誰留在暗中空等
像置身於薾裡盼望 又疑問

從前尚未願高飛 皆因薾裡似很美
當中的絲似會建起痴痴纏纏陣地

破薾方覺我實在原是這般繽紛
現我可欣賞這有自我的人

破薾方覺我實在從未這般逼真
再不空虛雖然是一個人

人生 怎麼分析都是半瘋瘋
昨日是真的 今晚會是夢
今天洒脫笑著行 承認兩手空空
在妄想的薾裡過活 又何用

從前尚未願高飛 皆因薾裡似很美
當中的絲似會建起痴痴纏纏陣地

破薾方覺我實在原是這般繽紛
現我可欣賞這有自我的人

破薾方覺我實在從未這般逼真
再不空虛雖然是一個人

★☆ ★☆ ★☆ ★☆ ★☆ ★☆

從前尚未願高飛 皆因薾裡似很美
當中的絲似會建起痴痴纏纏陣地

破薾方覺我實在原是這般繽紛
現我可欣賞這有自我的人

破薾方覺我實在從未這般逼真
再不空虛雖然是一個人

破薾方覺我實在原是這般繽紛
現我可欣賞這有自我的人

破薾方覺我實在從未這般逼真
再不空虛雖然是一個人

破薾方覺我實在原是這般繽紛
現我可欣賞這有自我的人

破薾方覺我實在從未這般逼真. . . . . .

2008年1月6日

心裹有個謎

二三十年多前羅文演出呢幕音語當時都有睇過,但到今日再睇番,都係咁熱血沸騰!好正呀!

購物狂

眾女扑友, 如三點怒火Hana都分別都在講購物狂,等音語又黎搭下咀先。

相比女人, 男人購物一般都無女人咁狂。

例如買衫,一般白領其實返工其實無乜特別配搭既。求其買幾件白色加藍色恤衫,再加四條領呔已經可以有八種配搭。再加埋深淺色西裝就會有十六種變化添 (襯得好唔好睇另計,但藍白色恤衫應該唔難襯),夠你三個星期有多啦。姿整d既話可以加埋袖口鈕,就會有更多變化。

男人係對機械有種辟好,例如私家車或名錶都係男人成日想買既野。但此類物品價錢偏高,除非你屋企大把或人工極高,否則你多數都係得過恨字。成日掛在口邊話買啫,係唔可能令到自己變為購物狂既。雖然有d人會obsess 買手機電腦相機等物品但始終花費有限同埋可以trade-in,最多都係半狂。

咁,有d乜野係會令到男人成為購物狂呢?

若果你係好似音語呢類七八十年代長大睇日本動畫大既人,咁你多數都會對某幾套動畫,例如高達,龍珠等有印象,細個亦有砌個佢地d模型。可惜唔係個個砌模型都咁叻。而日本商家方面睇準我地死穴滿足我地需要所以近年都推出唔少呢方面既精品,例如扭疍公仔等等。商家亦非常聰明,扭彈每套都係得幾隻幾十蚊套,唔係好貴等你唔駛點諗就洗濕個頭買第一套,然後就放長線釣大魚越出越有,等你不知不覺更越買越多唔停得手 - 無理由唔儲齊一套嘛! 呢d係童年回憶,真係唔可以用錢計架!

男人d錢就係咁樣陰d陰d用晒啦。

老餅,你返黎香港小心d呀,最近出左好多超時空要塞d景品呀!

2008年1月1日

日記

新年新開始,很多人喜歡由這天開始做些以前沒有做的事情,例如寫日記。

某年新年,音語忽然興起寫日記這個念頭。

當年音語是一個小學生,沒有太多零用錢,所以只是問媽媽拿本匯豐銀行送的日記簿來寫日記。

不知大家對該款日記簿有有沒有印象呢?日記簿有個紅色的膠封套,約一張半信用卡大,方便大家放入恤衫袋。封面通常是匯豐銀行的石獅子,封面一角寫著年份,如1984。內頁有些基本資料,如常用電話、英制/十進制換算、世界各地time zone等。後面每兩頁是一星期,然後有幾頁給你填朋友電話。

銀行每年都會送這些日記簿給客戶的。以前差不多每位顧客都有。現在銀行都仍然有派這類禮品,但只限大客,不過送的日記簿質素提高了,比以前的大本些而且是硬皮,更有一些是A4 size放在檯頭的行政人員日記簿。有很多秘書喜歡用這款日記簿來替老闆記下開會時間。

音語小時候,就是用那本小小的日記簿來寫日記。最初幾日都很認真地記下當天所發生事情。但一如過往,寫了幾天後音語已經開始偷懶,越寫越少,到後來只是記下該天天氣。還未到二月,音語已經放棄了。

扑友有米兄到今天仍然有寫日記的習慣,實在其志可嘉。

八號 . Maggie

前言:
新年新開始,音語嘗試新題材。這是一篇實驗性文章,並不一定代表本扑零八年風格。

----------------------------------

髮型屋內擺放了很多支洗頭水。

每支洗頭水上都寫上主人的名稱和髮型師的編號,如1號Shirley,3號許太,5號張小姐等等。能夠有一支專用洗頭水的,都是髮型屋的熟客。

對熟客而言,一支專用洗頭水代表她(是她不是他,很少男人會有專用洗頭水的)有能力負擔經常理髮的開支。因為如果你一個月才光顧一次,一支洗頭水恐怕用三年都用不完,是沒有人會讓你浪費空間的。同時專用洗頭水比公家洗頭水質素高,代表你可得到更佳服務。

對髮型師而言,一支專用洗頭水代表一份固定收入。所以大家都希望爭取多些熟客擺放專用洗頭水。但又於空間有限,所以每位髮型師都對甚麼顧客可擺放專用洗頭水有要求。因為若客人擺放專用洗頭水後不常光顧老闆是會「詐形」的。

阿強是這間髮型屋的髮型師之一,編號八號。

今天是大除夕,髮型屋開門不久,熟客Maggie到來光臨。

平時Maggie都是下班時間才到來光顧的。每次都是穿行政套裝來的,應該是下了班才來吧。每次Maggie跟阿強交代完怎樣理髮後,都只是一言不發默默沉思,一副在想事情的樣子。

阿強對Maggie相當有好感,所以每次Maggie光顧他都一手包辦,甚至連洗頭都親自處理,更會特別細心為Maggie按摩。

今天Maggie只是一身黑色便裝,包括黑襯衣,黑色牛仔褲及黑皮褸,架著一副太陽眼鏡,別有一番風味。

阿強問Maggie: 「Maggie小姐,今日放假?平時好少呢個時候見到你喎。」

Maggie:「嗯。」

阿強: 「今日又係好似平時咁整。」

Maggie:「嗯。」

阿強一如以往的落力為Maggie按摩。突然間Maggie問:「嗯,如果我想放支洗頭水在你店內,應該咩野手續?」

阿強聽到Maggie這樣說,心裏非常高興,說:「多謝先,其實都無乜手續既,你講低你想用邊隻洗頭水等我去買就得囉。不過其實你唔駛嘥呢d錢吖,我平時幫你洗頭果隻牌子都幾好架,我係熟客先同用呢隻,無另外收錢架!」

Maggie:「咁就幫我買支你平時幫我洗頭果隻牌子啦,我唔鍾意同人分享既。」

阿強似懂非懂Maggie的說話,回答說:「咁,多謝晒喎。我幫你開支啦。」

Maggie:「嗯。」

阿強在櫃內取出一支洗頭水,然後用箱頭筆寫上「八號 .Maggie」

Maggie再問:「今晚大除夕有乜節目呀?」

阿強:「無呀,都係收左工後返屋企食飯睇下電視囉。」

Maggie:「有無興趣一齊倒數?」

阿強:「都好呀,去邊到睇呀?」

Maggie:「尖沙咀?我有班朋友book左間餐廳慶祝。」

-------------

可能大除夕很多公司放早吧,今天阿強很多生意。一直到九時半才完成所有工作,然後直奔尖沙咀。Maggie的朋友都在跳舞,只乘她獨自在一角冷眼旁觀。阿強到後,Maggie說:「今天不太舒服,不如你送我回家吧。」

到了Maggie家樓下,正當阿強在考慮應否送Maggie上樓回家時,Maggie說:「多謝。既然一場來到,不如上來喝杯咖啡吧!」

Maggie的家很簡約,以黑、白為主色,襯托得很有品味。Maggie煮好咖啡後,問:「咖啡要加奶?定係想試下加d Baileys呀?」

阿強不知Baileys 是甚麼,但心想既然Maggie介紹的,應該一定是好的。所以說:「好呀!」

Maggie拿著兩杯香濃的咖啡出來,碰巧電視正在播放IFC的幻彩詠香江倒數,Maggie便跟阿強碰杯,說:「Happy New Year!」

阿強喝著咖啡,突然覺得滿天星斗,問Maggie:「點解我好似覺得醉醉地既,飲咖啡應該唔會醉架?」

Maggie說:「Baileys 係17% alcohol 既 Irish Cream Whiskey 黎架!」

阿強說:「弊,我唔識飲酒架.........」


(待續...)

-----------------------
寫到呢到,音語覺得個故事已經拖得太長,兼且唔知點寫好。不過既然香港已經進入高清互動年代,故事發展不如大家黎比d意見吖!