/

2010年12月31日

年結

唔經唔覺又一年了, 今年音語好懶, 在twitter 微博等地方多過update呢個仆, 呢度都已經半荒廢了...

不過既然今日係一年既結束, 咁又不如寫下今年既回顧吖...

今年家宅尚算平安, 阿嫲走左, 不過都去得幾平安, 成一百歲都算係咁了.

工作上都係一個死局, 無咩期望了...

投資方面今年都做得幾好. 簡單黎講, 今年買賣金額差不多 (net cash outflow ~= 0), 但投資組合增長14%, 跑贏恒指.

組合內今年新加823做胆,希望可以增加收息.

如果唔係音語手痕做左好多錯誤既買賣, 今年應該賺得更多, 不過音語都好心足了.

最後, 希望大家2011年一切平安順利!

2010年10月8日

中國人終於站起來了!

經過五千多年, 中國人終於站起來了!

唔係, 我地仲未成功霸佔尖閣列島, 只不過係中國終於有人攞到諾貝爾獎了!

你可能會話, 舊年高錕咪攞過囉? 但唔好搞錯, 高校長係美國人呀, 佢要交美國税架!

莫非呢個係諾貝爾委員會送俾中國後日九十九歲生日既禮物?

2010年10月5日

荒廢樂園

唔經唔覺原來已經兩個幾月無update過個blog, 但其實最近又真係無咩野好講... 唔通應該摺埋佢?

2010年7月14日

政府車

有無人可以解釋下果d醜樣既銀色野有乜用呀?好多政府車都有喎。

話時話又唔見d高官車有既?

2010年7月10日

決賽

四強音語只係估中一場,不過老實講德國發揮真係麻麻,輸波無話可說。

季軍戰繼續撐德國啦,冠軍方面,理性就緊係西班牙吖,但感性上就希望荷蘭可以贏到。

好,最後決定,都係跟八爪魚買!

2010年7月6日

四強會戰

嘩, 音語預測四強隊伍全部啱哂, 有跟既仆友應該執唔少啦, 記得請食飯!

長話短說, 音語估計決賽會係荷蘭對德國.

2010年6月30日

八強

經過四晚戰鬥, 終於產生了最後八強.

回顧音語既預測, 八強估中六隊, 都算有交代了.

八強對戰, 其中有兩場大戰都係早場, 相信球迷都好滿意.

阿根廷對德國音語都係睇高德國些少. 呢隊德國年輕力壯越打越進步, 有機攞冠軍呀.

荷蘭對巴西音語則睇高荷蘭. 今年荷蘭唔似以前咁, 非常團結, 應該有一番作為.

其餘兩場西班牙應該無問題, 加納對烏拉圭, 音語覺得烏拉圭發揮幾穩健, 可睇高半線.

2010年6月26日

十六強

不經不覺世界盃話咁快就打完48場分組賽,進入16強淘汰賽了。

分組賽基本上無咩冷門賽果,法國同意大利出局其實唔係好意外,反而日本入到16強就有d驚喜。

16強廝殺大家有咩心水呢?以下就係音語既心水:

烏拉圭應該可以打低南韓, 而美國亦可打敗加納;

另一面荷蘭同巴西應該在八強對碰;

阿根廷多數都會同德國在八強碰頭,如果真係既話呢場極有可能係冠軍前哨戰!

日本如果把握到機會應該可以打低巴拉圭,兩牙對戰音語則睇好西班牙。

2010年6月11日

世界盃

四年一度盛時今晚又揭幕喇!

不過今年由於音語受到利物浦前途問題影響, 所以都無乜mood睇世界盃,今屆如非必要都唔會睇兩點半場喇.

至於音語捧邊隊? 主觀願望當然係西班牙啦, 但理智上, 德國隊永遠都係示人以弱, 唔聲唔聲應該坐四望二, 分分鐘冠軍都有得攞!

2010年6月6日

政府都話起錨等同魔鬼

咁你仲支持?

2010年6月4日

五月過後




與你說過當五月過後 新的生活 攜著你雙手到秋涼
看見這裡的遍地碎葉 心彷彿碎裂 人已去 溜進了心裡
* 與你說過當五十歲後 新的生命 攜著你雙手到將來
看到這裡的每件事 湧出的是眼淚 隨過去 流進了心裡
# 沒有你 心裡是一絲絲痛悲 離開你 心裡萬千失落
堆起了心碎 You are all of my life
從前串串日子 怎已失去 (從前愛已靜止 game is over)
Repeat * #

2010年5月8日

貨底

雖然毎一個交易係應該分開來睇,但係如果要炒股,最好都係有貨底。

貨底既意義係在於如果萬一市况逆轉,有貨底在手係可以把兩批貨溝埋來睇,心理上會好過d。咁做既話就唔會一但反彈而因為之前被迫止蝕而錯過賺錢機會。

所以無貨底就唔好亂掂炒股呀!

2010年3月23日

祖國電訊一問

各位專家:

如果我要上大陸幾日,想用電話上網,有無邊款電話咭免合約可以俾我用3G或GPRS上網呀?

謝謝!

2010年3月20日

大師

在案件未審判完結前,大家唔通以為大師會自首, 道歉或講案情咩?所以記者會講左等於無講係正常既。

但記者會既作用係,轉移大家既視線,唔好再每日在大師門口等,等佢可以過得舒服d。

大家都係講左等於無講,但同早排德成局長發老脾話D記者:「我做新聞果陣時你地都未出世呀!」,大師呢招真係高幾皮。其實大師唔做局長真係浪費-至少第時都可以做教局長面對傳媒既公關啦!

2010年3月14日

本末倒置

毎當外地有地震時,我地經常睇到傳媒有以下內容:

"本港天文台錄得xx地方6.4級地震"

大佬,唔理你天文台錄唔錄到,地震都發生左啦!做乜要咁強調天文台錄唔錄到喎? 唔通你錄唔到就唔係地震咩?

2010年3月1日

跑到抽筋!

雖然感冒未清兼且跑到抽筋, 再加上天氣非常濕熱影響, 但總算完成了人生第一個半馬拉松!

由十公里升到半馬真係幾辛苦, 雖然音語已經苦綀一年但一入西隧一段真係好tough, 似乎今年一定要再加強練習量, 希望出年可以進步.

2010年2月27日

渣打馬拉松

話咁快聽日就係一年一度既渣打馬拉松喇!

音語今年挑戰半馬, 雖然都算準備充足, 但過年後一路病到依家都未好, 兼且天氣太濕太熱, 所以只係希望順利完成便滿足了.

希望大家聽日小心地滑, 順利完成!

2010年2月16日

尹佬

今日下午傳來消息,有亞洲第一中鋒之稱的尹志強先生病逝,終年53歲。

自幼已經睇尹佬踢波,亦有睇尹佬每周主持之英國足球大賽節目。可以話尹佬係啟蒙我睇英國波既人之一。 雖然77年亞洲盃對星加波我仲細無乜印象,但85年519一役同舊年東亞運並列香港足球史上最重要時刻,尹佬雖然無入波但貢獻亦良多。

亞洲第一中鋒可能有d誇張,但香港第一中鋒之名相信尹佬敢認第二無人敢認第一。RIP尹佬。

2010年2月14日

虎年喇!

祝大家;

虎年身體健康
心想事成
虎虎生威
恭喜發財!

2010年2月5日

正氣

其實真係唔想講, 不過見好耐無出post, 兼且繆小姐又真係寫出我心聲, 所以咪照抄囉.

正氣? 我覺得只係lessor evil啫.

http://msrachelmiu.blogspot.com/2010/02/blog-post.html

正邪
林官一鎚定音下,跨世紀長篇連續劇第X回暫分勝負。 勝方高呼的,不是怎麼「法律是公正的」,而是更響亮的「天地有正氣」! 即是說,正邪對決,邪不能勝正吧?只是,正與邪,大概只是相對,而非絕對。

King of Freak米高積遜生前生人勿近——如果有最令兒童驚嚇人物榜,米高甚或長居榜首。他長埋地下後,怪行不再,彷彿威脅減少,King of Freak始又升上神變回King of Pop,以及Father of Love。

曾經何時,孤獨無依兼不良於行的老家翁與富甲天下又奇裝異服的風騷新抱對決時,要定正邪(不是真假、對錯、勝負),又豈需法庭代勞?還記得那張「One Life One Love」的A4紙吧?看罷,是失笑,還是被那份終生不變至死不渝的愛情所感動?80後環保分子現在狂轟一眾發展商如何發水;但二、三十年前,當發水還未成為「行規」之時,某些住宅樓就早已漏水,以質素成疑見稱。

只是,這一切的總和,還是不敵騙財騙色的世紀賤男。法庭的判詞已經把人性的邪惡紀錄在案。但勝方,大家是否就認同是正氣的化身?還是,這不過是一山還有一山高呢?

這套連續劇距離終極結局篇,大概還有段距離。上演好戲的同時,彷彿聽到葉振棠在高唱:「人海的衝擊比那滄海更大,難為正邪定分界」。

2010年1月14日

政棍講野

09年12月29日: 明年可能雙底衰退

http://hk.news.yahoo.com/article/091229/4/fvb8.html

10年1月14日: 虎年香港虎虎生威

http://hk.news.yahoo.com/article/100114/4/g45c.html


同情地了解, 政棍所指既"明年"係2010年1月, 所以虎年香港可以虎虎生威.