/

2009年12月31日

零九私事回顧

1. 家人尚算不錯,程家仲有新成員加入添。
2. 健康亦算正常,仲輕左十五磅。
3. 投資雖然犯左唔少錯誤,錯過唔少機會,但總算做得幾好(視乎你有幾貪心)。
4. 工作則越來越差,似乎係時候諗下應該點做。

投資年結

一年將盡,又係做年結既時候了。

經過08年既大跌,09年係豐收既一年。音語基金大升73.6%,跑贏恆生指數21.6%。

但當然,09年大市係上升,如果音語基金唔升都唔好意思話俾大家知。如果以兩年計,由08年初到09年尾,音語基金基本上無升跌, 而相對同期恆生指數則下跌21.3%。

但雖然如此,音語回顧09年投資,整體來講可以話係失敗。

音語基金可以跑贏大市主要原因係(1)大笨象絶地反彈,供股果批揸到依家跑贏大市;(2)音語年中增持貴金屬亦大升。但年內音語其他策略基本上係完全失敗。

記得音語年初講過,今年策略係保留實力,累積財富,短炒取利,而其中既關鍵係短炒取利。音語在短炒方面簡直係失敗。

年初音語想從波幅中取利,所以曾經短炒股票。當中最輝煌成績係在三月初全年最低價一萬一千點當日入市-不過可惜係萬三點左右就放了...

在IPO短炒方面音語今年投機左八隻,當中有賺有蝕埋單計數只係微利,大部分利潤都俾銀行食哂... 不過最最失敗方面係timing。相信音語既tweet友都知道音語timing失敗既慘劇同損失既巨大,d傷心野都唔想再提了...

總括黎講零九年成績雖然比上(如Hana)不足但比下有餘,零八年做義工零九年勉強總算賺多一年人工。展望二零一零投資組合現有股份都唔會郁,不過在短炒set上賺價方面希望可以做好d,唔好咁容易就被knock out。 同時亦希望有機會投資組合內增加新能源及內房兩類股份,使組合可以跑賺大市更多。

最後總結,投資場上過山車唔怕坐,最緊要終點比起點高,happy 2010 trading!

2009年12月12日

有今生無來世

今日音語親身目睹一件相信有生之年都未必有機會再遇到既偉大場面。

面對大日本皇軍既強力轟炸,香港隊沉著應戰,終於在主場三萬多球迷支持下,十二碼擊敗對手, 有史以來第一次,恐怕都係最後一次,在大型比賽奪得冠軍!

無錯,對手並唔係國家一隊,但始終要得到冠軍係需要連番惡戰,絕對得來不易!

香港好波!We are the Champions!

2009年12月11日

香港加油!

嘩香港今次真係勁, 在大東亞運動會四強擊敗金正日隊, 決賽將會同大日本決一高下.

唔係長他人志氣, 大日本真係一隊好強既對手, 尤其佢地竟然在賽前苦練三分波, 相信佢地既遠射會好有把握. 香港隊真係要打醒十二分精神呀!

音語仲係到揾緊波飛, 唔知邊位仲有免費波飛呢? 音語真係好想入場睇睇香港隊創造"轉"奇一刻呀! (係呀, 應該讀"轉"奇, 唔係"全"奇呀!)

香港加油! Hong Kong Add Oil!

2009年12月8日

咁快就自滿?

憎突叟: "東亞運動會剛剛開始了,我們看到香港人一鼓作氣,做出了這麼多的成績,是值得人驕傲的。我們到目前為止,我今早出來時有六個金牌,二十幾個獎牌,我很相信我們繼續比賽下去,會得到其他的獎牌。我們香港人一定要走在一起,為我們的運動員打氣,令他們一鼓作氣,做出一個好好的佳績,藉東亞運動會整個的表現來提升國際地位。"

憎突叟應該係想講英文既proud of. 其實呢個情形應該用自豪, 鼓舞等詞語比較合適. 如果唔識唔該睇多d書, 學好d中文先啦!

2009年12月4日

創造傳奇一刻

仲有一日, 就係一個全香港人等左好耐,空前絕後,有今生無來世既日子,東亞運既開幕!

好多人或者會問,究竟香港有無能力辦咁大型既運動會呀?音語可以好肯定咁話比大家聽,We are ready!

唔信?睇下啦,你睇日本隊既訓練場地幾正?











咦,睇真d呢隊係日本足球隊喎,唔通佢地苦練三分球, 單檔及人釘人等戰術在足球場上用?勁喎!

大型運動會又點可以少得大會主題曲呢?為左紀念呢個歷史性既時刻,不如大家一齊跟住唱東亞運既主題曲吖!




東亞運超人

主唱:尹光
作曲:古曲
填詞:梁建邦
編曲:麥皓輪

講起亞運呀 人馬出眾 靈舍耍家 
乒乓波我最叻 訓身拉波 馬林亦怕 
玩波我最強悍 我踢波灌籃都會入 
連環射正 包冇撻Q 側身西到個波都斜 

燒搶去射野 平日放飛劍 夠我準咩 
烏蠅都嚇到扯 對準一飛 佢成PET野
短跑無話難度 我追巴士 都幾咁辣 
唔停站 我飛撲追車 飛身追到衫都斜 

去香港 睇東亞運 夠晒YEAH 笑騎騎 
去香港 睇東亞運 夠晒YEAH 笑騎騎 
睇D好野 睇D好野 睇D好野 

講起亞運呀 人馬出眾 靈舍耍家 
高空跳水 有郭晶晶 我黎目及下 
Super丹既強項 佢左手殺波 攞你命 
姚明勁到 渣漢堡包 
單手爆籃 認真正 

燒搶去射野 平日放飛劍 夠我準咩 
烏蠅都嚇到扯 對準一飛 佢成PET野
玩波我最強悍 我踢波灌籃都會入 
連環射正 包冇撻Q 側身西到個波都斜 

去香港 睇東亞運 夠晒YEAH 笑騎騎 
去香港 睇東亞運 夠晒YEAH 笑騎騎 
去香港 睇東亞運 夠晒YEAH 笑騎騎 
睇D好野 睇D好野 睇D好野

哭股喪

原來見財化水, 賺少左係可以比真金白銀蝕入肉傷好多, 好多...

雖則係有微利, 同時音語亦都好明白唔係你財唔入你袋呢個道理, 但今次一時做錯决定真係好傷好傷好傷好傷好傷, 鳴鳴鳴鳴鳴...

希望可以吸取教訓, 下次唔好再犯啦...

2009年12月1日

吉列的咀咒

三大國際體育明星為吉列公司拍攝既廣告, 相信大家都睇過了.

最近三大巨星都不知何故發生意外.

先有亨利犯手球被世人指為騙子, 再有活士涉嫌婚外情兼炒車, 早兩日連費達拿都爆冷輸波俾迪維丹高...

睇黎掂親吉列都有d危險喎... 死火啦, 音語都有用吉列產品喎, 會唔會都受牽連呀?

2009年11月28日

逃學威龍

警方今次吐氣揚眉, 派出臥底女警潛入學校, 一舉瓦解毒品集團!

但警方可能太耐無咩好野, 所以有d得意忘形, 竟然向公眾宣佈校名同臥底女警名字.

警方都知衰啦, 在校長公開投訴後終於道歉, 警務處長特警成更表示會嚴肅詳細調查校名曝光事件, 如有需要會進行紀律行動.

音語覺得最可憐係果位警花. 俾人揚左做臥底唔知第日仲有無運行. 阿蛇又無同佢道歉, 真係死得不明不白.

不過從好果方面諗經過呢件事我諗d校長同家長應該無咁天真會相信警方校園驗毒會保密啦. 希望大家都明察秋毫, 反對校園驗毒計劃!

2009年10月29日

罵人的藝術

加州州長阿諾舒華辛力加的硬漢形象相信大家都耳熟能詳.

原來佢做左州長後都依然係咁有火!

最近佢因為不滿立法單位的行政效率和態度,寫了封信告知加州立法單位,說明自己不簽署這些法案的理由。

但封信原來係有暗號既:

2009年10月26日

At the end of the storm, there's a golden sky

Yes!




2009年10月24日

多謝三點!



我地終於唔使在A1見到憎突手個衰樣喇!

2009年10月19日

經濟好轉

最新公佈,本港失業率在金融海嘯後首次回落,最新失業率5.3%

對於經濟好似好轉音語亦感覺得到。有幾個在金融海嘯被裁的朋友最近都重新工作。

雖然朋友們揾到工但人工比以前差,但音語覺得總比在屋企坐好。始終有份工作個人都好d。

希望眾朋友早日人工回復以前水平!音語亦係時候諗下自己前途了...

2009年9月27日

陸鳩會

在巔巔個仆度戲言, 原來澳洲總理陸克文真係有同日本首相鳩山會面,有相為証!

2009年9月21日

9月22日無車用

9月22日國際無車日,你估條街會唔會無咁塞?

音語可以寫包單一定會,因為政府三屍十二焗問責團隊會響應, d乜長物長仲話聽日會搭地鐵添.

但問題就係呢到喇。聽日搭地鐵如果有市民遞請願信佢地會唔會擰開塊面扮睇唔到唔接?又或者是旦男會唔會又出現呢?另外,d乜長物長既司機聽日係咪唔駛做,定係被逼放Annual Leave? 定係可以名正言順辦公時間去打牌了呢?

真係坐低等睇戲啦!聽日如果唔塞車音語就可以早些少返到公司,正呀!

2009年9月17日

網上交友要小心

最近jim jim 同 ming ming 既故事在網上相當流行。故事主要係叫大家網上交友要小心。

http://www.weekendhk.com/blog/forum/viewthread.php?tid=11627

想起來音語都試過同新相識既網友在香港之外既地方,如九龍及新界等地見,好彩大家都係好人,如果唔係音語可能已經上左警訊了...

又,港台可以在有限資源下拍到咁好既節目,真係值得大家撐呀!

富甲半山

又講樓盤.

近期最hit既樓盤一定係富甲半山.

一個位於土瓜灣既樓盤竟然可以塑造到歐陸風采以吸引大陸水魚買家, 真係不得不佩服香港人既創意.

不過呢個樓盤最大既敗筆係改壞名.

富甲半山, 只係富甲半山喎, 仲要係半山一號only, 咁住山頂果d係咪比你更富呢?

計我話應該叫做富甲宇宙先夠氣勢.

2009年9月5日

鳩山

明明係讀gau, 點解全香港d新聞都讀溝?乜唔係要正音咩?

2009年9月3日

我的十五套電影

只係列舉在戲院睇過既電影:

1. 英雄本色: 港產片中既經典。 睇完套戲點可以無件Mark哥褸旁下身架? (其實67年龍剛版都好好睇, 四哥好形, 不過因為只係在電視睇所以不在十五套之內)。

2. 大都會 Metropolis: 1927年既劃時代巨獻。 片中對未來既視野描繪可謂走在時代尖端, 對後世電影界影響甚大。 音語係在某年藝術節在大會堂看的。

3. 超人特攻隊 The Incredibles: 呢套緊係正啦, 如果唔係我都唔會攞Elastigirl 黎做我既頭像啦! 呢套亦係我同佢唯一一套單獨睇既電影。

4. 超人 Superman: 對少年音語黎講超人真係偶像中既偶像。 Christopher Reeve 個樣真係好似漫畫中既超人。 最尾一幕反轉飛行令到時光倒流Lois Lane 復活真係好感人!

5. 鬼馬雙星:係音語有印象中第一套睇既戲(其實都無乜印象架)。

6. 鐵甲無敵瑪利亞: 套戲其實好一般, 但係音語第一套一個人睇既戲, 故此一記。 唯一值得一提係先鋒二號瑪利亞改造過後的外型好似大都會入面既瑪利亞, 應該係salute 黎既。

7. 最佳拍檔: 阿Sam 轉投新藝城第一炮。 當年呢套片大收二千七百萬, 更成為到目前為止香港最高入場人次的港產片, 音語都入戲院睇左兩次。 根據資料如果換算成current dollar最佳拍檔係香港有史以來最賣座既電影。

8. 鐵金剛勇破太空城 Moonraker: 占士邦片中音語最深印象係呢套, 主要原因係鋼牙佬。 又, 想當年睇占士邦片每當老占要同女主角埋牙肉摶時阿媽都要音語掩埋隻眼, 而想當年音語恰下恰下又竟然真係無講大話有掩住隻眼唔睇喎。

9. 月黑高飛 The Shawshank Redemption: 一套睇完會令人對世界充滿希望既電影。 當年上畫時可惜遇著Forrest Gump, 所以雖然奧斯卡七項提名但都空手而回。 但一套偉大電影係唔會被埋沒既。 後來月黑高飛被選為史上最偉大電影. 際遇其實都同電影內容有幾分似喎。

10. 情書 Love Letter: 藤井樹. 小樽. お元気ですか。私は 元気です。

11. 賭神: 同陳金城賭局一場戲真係峰迴路轉。 摸戒指動作同隱型液晶型顯體眼鏡真係估你唔到。

12. 搶錢家族: 竟然wiki無呢套片? 想當年在影藝做足524日橫跨三年, 做左好耐都仲係要排長龍先買到飛睇。 你無理由未睇過掛?

13. 重慶森林: 一套完全拍出村上春樹風格既電影。 仲記得金城武d 菠蘿罐頭嗎?

14. 花樣年華六十年代是最美的。 本片沖印出黎既六十年代亦相當美麗。

15. 拿破崙 Napoleon: 片長330分鐘, 由下畫2:30做到十點(中間有兩個小break同個半鐘dinner大break)有小交響樂團伴奏, 到最尾一幕仲要有三聯式播放, 可以稱為史詩式電影。 詳情可看戲院誌對本片既描述。 套戲咁長咁經典, 音語覺得睇完應該每人俾返張奬狀至啱。

2009年9月1日

雪豹

Mac界友好近期話題已經由哎3GS轉到上星期出既OS, Snow Leopard 雪豹.

雪豹的upgrade版零售價只係$238, 由於咁平所以吸引到大多數人都會買正版. 而根據官方資料, 你係需要有上一代OS Leopard 先可以用upgrade版既.

但實際上無論你有無Leopard, 甚至係一部吉既hard disk, 你都可以用upgrade版安裝雪豹. 仲有安裝雪豹係唔需要入任何password 既, 大家係講個信字.

Apple 既信念係 "rewarding honest people with a hassle-free product rather than trying to punish dishonest people by treating everyone like a criminal." 同Microsoft 相比, 在對用家方便程度呢一方面黎講可以話係高下立見.

再睇真d, 講左好耐既校園驗毒計劃, 其實咪又係trying to punish dishonest people by treating everyone like a criminal. 政府可唔可以醒少少諗d方法係rewarding honest people with a hassle-free product 呢? 如果咁做大家一定會容易d接受呢d計劃.

2009年8月31日

分子料理

今日偷聽到以下對話:

女: 喂電視飲食節目介紹分子料理幾得意喎, 不如我地揾日去試下吖.
男: 好呀, 就今晚樓下齋鋪啦.
女: 乜齋鋪有分子料理咩?
男: 緊係有, d齋鹵味整到好似真鹵味咁樣味道, 咪同分子料理既原理差唔多! 計我話其實鬼佬係抄我地中國人既.
女: ......

2009年8月22日

內有家鬼

車公真係應驗, 政府真係內有家鬼!

行政會議一早已經通過調低高級公務員工資。 但工聯會會長兼行政會議成員鄭耀棠竟然公開同政府唱反調, 表明不同意高級公務員減薪。 已往一直奉行既集體負責制, 睇怕已經早已不存在。

音語諗大家呢個時候都出黎抽水既原因係政府無能, 大家都想同佢d衰野畫清界線。 但身為行政會議成員即係政府內部核心, 應該幫政府。 作出決定後,大家都要尊重和維護決定。 今次鄭耀棠咁樣做即係唔跟大隊, 既然同政府意見相左, 理應好似2003年田北俊因決定不支持二十三條的草案三讀,辭去行政會議成員職位。

如果佢唔肯辭職, 憎突手應該發揮強勢炒左佢。不過音語就唔信佢真係咁有吉屎喇...

2009年8月12日

反網絡暴力宣言

反網絡暴力宣言
—————————————————–

互聯網是自由媒介,所有網民都享有言論和思想自由,不容干涉。
思想和言論自由,是香港社會的基石。網上網下,我輩都有責任好好維護這個權利。
反對一切防礙網絡自由的行為,包括:
壓制甚至禁止反對意見
利用軟/硬手段,甚至恐嚇,去令反對聲音消失。
本人對網絡暴力行為深表遺憾,故貼此宣言,希望網上的言論自由和人身安全,得到保障。

—————————————————–

正如怒眼及燒豬講, 停唔停仆一星期唔重要(實情音語近期多數twitter搞到個仆都半荒廢...) 但重點係個精神. 網絡欺凌經常發生, 無論你去欺凌人個理由有幾充份, 欺凌就係欺凌, 唔啱就係唔啱。

2009年8月3日

16年後

1993年



















2009年


















頭髮竟然濃密左,除左帶假髮外仲有乜野好方法?

2009年7月18日

加薪 . 減薪

今日報紙頭條係金管局新總裁, 大大隻字話係減薪入職, 聽落好似好偉大, 搞到音語差不多要感激流涕.

但音語發覺陳先生以前邊有咁高人工, 所以根本上佢係升職加薪.

音語諗報紙咁樣講係因為同以前呀任總成千幾萬人工, 相比下七百幾萬就好似係減左人工.

但全世界都知每個職位都有一個pay range, 點可能一個新人坐呢個位未到pay range 頂點就可以話減左人工? 經驗無上手咁好, 點可以同上手比? 如果係咁做足五年咪應該升到二千萬?

不過無論點陳先生都係唯一最適合人選, 音語都希望佢係值呢個價錢, 幫香港繼續發展就皆大歡喜喇.

另外新既大內總管仲話係有史以來最年輕. 大佬, 都成四十五歲喇, 人地英國美國做得首相總統啦, 講出黎唔怕比人笑咩? 乜依家香港實施緊老人政治咩?

2009年7月11日

港交所 X Adidas

唔知點解音語睇CCTVB有關港交所既新聞時,經常都見到呢位用Adidas廣告裝飾自己個位既經紀。其實係唔係CCTVB毎次都係播舊片,定係每次都係同一角度影呢?

不過無論點都好,我諗Adidas都應該俾d廣告費呢位經紀先啱。

2009年7月1日

半年結

時間過得真快, 又係時候做半年結了.

零九年上半年, 音語投資基金大獲全勝,上升 46.4%; 和同期恆生指數比較, 仲跑贏 13.4%!

就咁睇你緊係覺得音語英明神武啦, 但其實唔怕講句, 音語既成功全靠符碌既.

音語上半年最成功既投資就係大笨象供股. 呢批股票乜都無做就由廿八蚊升到六十五蚊, 仲點會跑輸大市?

其他組合內股票大部分都同大市同步或跑贏大市, 關鍵係我無做任何野, 由得佢自己升.

至於年初音語話過今年買賣會多些, 結果又如果?

答案就係買左兩次股票,兩次都有賺, 其中一次仲要係三月九日全年最低點11344點果日入市添!

只可惜捉到鹿唔識脫角, 音語驚驚青青下在萬四點左右放鬼哂了, 可謂損失慘重.

所以上半年總結係少做少錯. 長線投資堅持不賣, 月供計劃繼續執行. 如果在set take profit 位上做好d既話就會賺得更多.

從零八年年尾急跌開始,音語基金已經完全收服失地. 音語覺得主要原因係月供平均買入法。雖然呢個方法一定唔可以賺盡及在股市下跌時依然會有損失(不過唔會大蝕),但好處是收服失地比較快及賺錢機會比較大(但未必賺得多). 但對音語來講穩陣投資比較重要。月供的威力假以時日一定會發揮出來.老實講雖然依家已經萬八點但相信仍有好多人依然未返家鄉.但如果你好似音語咁用月供既話相信已經有賺了.

至於下半年策略都大致上同上半年差不多. 唯一分別可能係會抽多d新股(但走位要快). 同時積極考慮買黃金(撐爺,係唔係學曹蛇話齋睇$1350呀?)

2009年6月23日

成功的廣告

一個廣告點先算成功?

音語認為,一個廣告如果能夠使觀眾看後記得佢所宣傳既產品,應該都算成功。

古天樂呢個廣告都算係近期一個成功既廣告了。


雖然呢個廣告好騎呢,但佢好成功既係令人一睇再睇,仲會將呢個廣告forward比其他朋友,幫手宣傳。

我諗依家無乜人唔知Yokoyama輪胎係可以節能啦!

又,關於古天樂既國語,音語相信係廣告既作者(好大機會係香港人!)特登配合而寫既。如果唔寫到好似粗口咁,又點會令咁多人幫手免費宣傳呢?

又,如果你係在音語仆呢到第一次睇到呢個廣告,咁一係你無乜朋友,或你d朋友太過正經。音語諗無論係那個原因都好,你都應該檢討下你自己交友方面啦!

2009年6月10日

今次我信CCTVB

CCTVB作為中央既喉舌,音語一定信佢既新聞。拿,佢話架:




曾蔭權 行政長官 是社會的敗類

2009年6月6日

破財擋災

音語仆既忠實讀者(如果有的話)應該記得音語個多月前曾經衰十一俾警方拉左罰款四百五十蚊.

其實當日音語以身犯險係要載人應考. 早兩日考試結果出左, 結果成績非常好. 145/150.

似乎相士之言話音語會惹官非, 宜破財擋災係講中左. 呢四百五十蚊真係money well spent.

人數

六四燭光晚會, 主辦單位表示在維園有十五萬人參與, 尚有約五萬人入唔到場. 但警方運用超級電腦, 準確計算出入場人數為六萬二千八人, 多個唔多少個唔少.

大家都知主辦單位一定報大數而警方一定報細數. 根據音語運用超級人腦計算,將兩方面數字加埋除二, 相信有十一萬人參與呢個數雖不中亦不遠矣.

其實有幾多人入場根本唔緊要. 今年係音語第一次參與六四燭光晚會, 主要原因係憎突叟吹雞, 點可以唔去?

收到警方數字政府應該可以安心了. 七一遊行睇怕都係得六萬二千八人入場, 多個唔多少個唔少.

2009年6月4日

封仆啓事

為響應中國網站維護節,音語決定今日封仆一天。

2009年6月3日

天問

縱怨天 天不容問?
嘆眾生 生不容問?

有些時情發生了後,
當權者不容百姓問,
是心虛?還是自比為天?

血染的風采

一首本來係歌頌解放軍的歌, 廿年前突然成為一首禁歌. 所謂何事?

2009年6月1日

你知我知

廿年前的一夜究竟發生乜野事, 相信三十歲以上既人, 無論左中右敢唔敢講都好, 都應該心中有數. 雖然倫伯已經轉呔, 但林振強先生既歌詞係唔會改變既. 正如下面呢句:

其情形na na na na na, 大家都知.

兩周年

今日是敞仆兩周年紀念之日.

兩年來音語寫了202篇所謂文章, 大約有九成都係無乜內容, 只係音語自言自語之作.

本仆一向人流極少, 但竟然有26人在google reader 訂閱, 可謂異數.

寫仆兩年最大得著係認識了一眾仆友,其中部份更曾見面. 在眾仆友身上音語學了不少知識, 在此音語謹向眾仆友一一謝過.

在此兩周年之際, 音語特別準備一個特輯,希望眾仆友無論左中右都細心留意.

2009年5月30日

小心地滑

唔知點解每次見到呢個牌我都覺得佢既英文唔應該係 Slippery Floor, 而應該係Slip Carefully至啱。



小心地 滑

2009年5月28日

喜氣洋洋

今日一上網,無論msn或facebook都喜氣洋洋

所謂何事?莫非慶祝端午節?

緊係唔係,係呢個原因至真(偷笑中)!

2009年5月27日

解讀

財政司司長話相信本港經濟已經見底,但預計年底將會再派糖。

既然經濟好轉咁點解仲要派糖?唔通錢多?

根據音語既解讀,派糖既原因係要塞住我地把口,咁點解要塞住我地把口呢?

咁緊係掩口費啦!

咁點解要掩口?

緊係有人將會講錯野啦!

歷史,將會是不斷重複的。

2009年5月20日

食左酸梅乾變...

好正! 4,800円, 好想買,不過無位擺...


2009年5月18日

無奬遊戲

你可唔可以一眼睇完即刻讀出下面個聯絡電話係幾多號?



答案:2331 2663

2009年5月14日

嚴正聲明

呢條仆街

既言論並不代表音語立場,敬希垂注。

曾蔭權表示,他的意見是代表香港人的意見,香港人的意見亦會影響到他,他感覺到香港人是有這樣看法。曾蔭權的說法隨即引起李卓人、張文光等議員要求澄清,他的意見不是代表他們。
曾蔭權澄清,他的意見只是代表一般香港人,不是全部香港人,他的言論惹來全場「噓聲」,公民黨等泛民議員更離場抗議,而社民連梁國雄更高呼口號憤然離場。

既然佢話佢係代表一般香港人,咁音語一定係非一般香港人了。

2009年5月7日

文化

究竟香港有無文化? 答案係有既.

如果你睇生果日報, 你就會揾到副刋入面有文化版,內容都幾豐富架, 分別有諸事吉星座同諸事吉生肖, 總共有廿四個架, 仲唔夠豐富?

2009年5月5日

打和

經過連日升升升,音語組合今日終於接近打和點,係近幾個月黎第一次!

家下仲係於打和點徘徊,不過音語估過幾日都應該會跌返落去卦... 希望再比音語一個機會入市啦。

又,見今朝升得咁急升穿一百蚊音語今朝竟然一反自己原則賣些少長線組合內既388套現。希望今次唔好做明燈,賣完仲狂升啦。

2009年4月24日

衰 十一

定額罰款交通罸行第十一條 在禁區內駕駛 罰款四百五十元

今日要到一個陌生地方,竟然誤闖禁區,結果當然係罰款了事啦... 好彩唔使扣分。

相士話過今年音語會惹官非,又幾準喎。希望真係破財擋災啦。

又,警察叔叔非常好禮貌,唔好意思前唔好意思後,咁既服務態度,抵讚!

2009年4月20日

我國又一偉大設計!

鬚刨電話電擊火機電話後,我國又一偉大設計!今次係天使魔鬼混合體,唉瘋加落機呀N95!



一個價錢兩個享受,你話係唔係超值?

2009年4月18日

大是大非

問埋哂d無關宏旨卻模糊焦點既疑問,
唔通就可以巔倒是非指鹿為馬?
見到呢d咁既大學生,
我慶幸我唔係港大畢業。

2009年4月15日

你永遠不會獨行

給希斯堡的死難者
二十年了
我們從未忘記
終有一天
你們會被平反
願你們安息
你永遠不會獨行

2009年4月10日

卡片

原來卡片既用途係咁大,可以做入息証明。

好,音語下次去銀行借錢都攞張卡片做入息証明先。如果銀行唔批我實向政府投訢。

又,香港真係越來越烏煙瘴氣,政府一再施政失誤,以往我地引以為豪既專業操守又越來越差,就黎無添呀。再係咁落去過多幾年分分鐘都唔可以叫做法治社會,仲衰過大陸。其實係唔係要認真考慮下移民呢?

2009年4月1日

禮儀師

確係一部好電影.

導演能夠把一個咁沉重既題材拍得咁淡淡然情感, 確係抵佢攞奬.

不過唔知音語係唔係冷血, 睇完部戲音語最想做既竟然係



K
F
C
!

(有睇部戲既應該知點解卦...)

2009年3月31日

電擊火機電話

繼上次鬚刨電話, 音語又有好介紹, 今次係防狼加打火機電話ZTCA169!

哪,你睇,天線部位其實係有電擊防狼功能㗎!個打火機仲要係潛望式,勁呀!



咁多功能既占士邦式只係賣人仔820真係好抵呀,仲唔快d上去買?唔夠喉?比多幾幅上你地睇啦!



2009年3月30日

新低!

係呀, 你無眼花, 真係新低, 不過唔係股票.

話說今日音語如常午飯時間去跑步, 跑完後上磅, 發覺體重竟然係四個月以來新低.

最奇怪係, 最近因為天雨關係音語已經十日無去跑步; 其間亦因為工作繁忙, 只去過一次gym; 而最近亦無食少左野, 反而上個weekend 唔知搞乜野竟然自隊兩支紅酒...

在如此情況下體重竟然可以創新低, 音語惟有話, 體重既野可升可跌, 同你食幾多做幾多係無關係既...

2009年3月28日

特色單位

做乜依家d樓盤無論位於幾山卡罅地方都要整一層做特色單位?你話住d豪宅區都話再住好d都值啫,但住到大角咀呀,深水埗呀,我就真係唔知為乜喇。唔通係為左㩒電梯時比人知到你係水魚有錢買到特色單位?但如果有錢你又唔買豪宅區?

2009年3月26日

鬚刨電話

經典真係經典。在星爺經典國產零零渿出現既鬚刨電話在2009年終於強勢登場!

仲要係雙卡雙待、200萬像素的照相機、2.6吋觸控螢幕、FM收音機、藍牙。只售人仔七舊半,真係折開逐件分純計都唔只呢個價啦!










2009年3月20日

春分到 蛋兒俏

是日春分。

故老相傳,在春分當日由於白天和夜晚的平衡, 所以會好容易將雞蛋站立起來。






.
.
.
.
.
.
.
.
.
.
.
.
.
.
.
.
.
蛋!





除左隻蛋外,音語今日中午跑步時亦曾經坳柴,但都可以即刻企返起身繼續跑。唔知同今日係春分有無關係呢?不過依家隻腳開始痛囉...

2009年3月17日

執左先算

話過今年會短炒為主音語真係身體力行,so far 今年已走了三轉仲好好彩三次都有錢賺。雖然在set stop loss 價方面稍有差池但始終賺少d總好過蝕鬼左去。相信個市仲會跌落去所以今後仲有機會走多幾轉。

忽然覺得咁樣做又幾似專線小巴司機,在固定路線上行走賺錢。

2009年3月7日

地鐵路陷

早幾日落大雨, 據報深圳起緊地鐵既地方突然地陷, 發出聲響大到好似地震!

音語好日都唔返大陸, 尋日一返大陸就適逢其會, 被困地陷之處.

經過路陷之處塞車塞到飛起, 短短一段十分鐘路程竟然塞左兩個鐘! 真係大失預算...

哪,睇下個窿幾大!





又, 深圳地鐵個logo其實係香港地鐵個logo中間加一棟, 可以講係好野自然有人欣賞抄考. 但香港地鐵竟然自斷單臂, 走去改名做港鐵. 香港只係識所謂破舊立新,但成日將d好野掉哂. 根本上港鐵呢個名唔可以突出地鐵在地下行駛呢個特點, 反而深圳當局識貨, 好野!

2009年3月6日

巔倒是非

報載機場阿嬸lur地,國泰竟然買佢怕,upgrade 佢上 business class。

國泰咁都得?唔怪之得世風日下個個人都鬥大聲啦。所以社民連既行動係正常既,反映現實嘛。

音語下次都要試下睇下會唔會 upgrade 下我先得。

2009年3月2日

獸頭

今日除左匯豐供股外,仲有一單大新聞,就係bid左獸頭既買家竟然唔係何博士,而真正買家仲話拒絕付款。

音語估計,買家其實係真係想買黎獻比中國政府既。不過因為果個民間組織聲大夾惡,話要拉個買家,所以咪臨時縮沙。

唉,早知咁兒嬉音語都bid埋一份啦, 話唔定音語可以成為愛國人士添...

2009年2月27日

上網輔導員

今年財政預算案話要請上網輔導員,唔知係唔係呢隻呢?

2009年2月20日

浮誇

香港人D樓盤名真係越來越浮誇。

以前樓盤叫乜乜花園乜乜城,但近幾年D樓盤就叫君臨天下呀,曼克頓山呀(但在山卡罅地方),真係有咁誇得咁誇。除左中文名誇之外,好多樓盤仲要加個唔知係法文定意大利文定西班牙文既名,總知就係唔識讀啦。

最新仲有叫天壐,真係令人驚嚇。唔知幾時有個樓盤會叫天堂呢?

又,君臨天下D住客搭的士時講“唔該去君臨天下“時會唔會面紅或忍唔住笑呢?

2009年2月13日

崖上的Gucci

2009年2月8日

跑完啦!

跑完啦!跑完啦!

可能今年練習充足,加上唔係太熱,音語竟然跑出個人最佳成績,認真唔錯。

出年都要繼續努力,希望再跑快d。

2009年2月6日

準備就緒

已經係第五年參加喇. 今年既準備係前所未有既充足.

經過多月練習, 跑畢全程相信問題唔大, 但可唔可以跑得好成績音語信心就唔大. 練咁耐都加唔到速度, 都係盡力而為吧!

今日最後一節練習完成, 身體狀況尚算良好, 唯獨聽日有要事所以未必有充足睡眠, 加上天氣稍熱及潮濕, 希望影響唔會太大吧 (又或者可以跑得差比D野自己賴).

後日見.

2009年2月3日

止蝕

止蝕從來都係一個好困難既決定。

首先要擺脫心魔,接受自己最初判斷錯誤,入錯貨。其次要接受既係金錢上既損失。再加上旁人說三道四,同埋止蝕後可能會再升,呢個決定真係唔容易。

Robbie, 保重。雖然你已經離開我地,但希望你會在適當場合入波,助我地一臂之力。

2009年1月31日

直線電話

經常在新聞聽到,國家元首會有直線電話到其他元首,以商討重要事情。例如早幾日奧巴馬就同我地胡主席吹吹水。

音語一直都好好奇直線電話究竟係點運作。細個睇batman,警察局長有個電話係冇撥號,一扲起就直接到batman屋企。領導人d直線電話其實係唔係差唔多呢?

另外,其實個電話放在邊到?如果領導人外訪咁有無人聽電話呢?重有大家都講唔同語言,有無個翻譯廿四小時候命㗎?

又, 今時今日大家都有手機,其實仲須唔須要直線電話呢?打手機方便好多喎(如果無人偷聽到的話)

最後,如果係温總聽電話,長途電話費咪好貴?如果奧巴馬打黎話有外星人襲地球,我怕佢地未講完對策外星人已經打到黎喎...

不知所謂的稅局綱頁

稅局的綱頁可以話係user unfriendly 之最.

首先你一定要用internet explorer 先可login, 仲要用某個java 先得, 咁音語在公司就唔可以login喇.

呢個其實可以賴係保安理由 (雖然用IE係絶對唔安全...) 但跟住當你每次稅局有messege比你時, 佢會send 個 email 比你, 話你知你有messege, 然後當你login 後, 你重要download 一個pdf file, 然後會收到你個messege, 例如係, 你的第一期稅款將於二月五日到期....

但問題係, 點解唔可以email上話比我知幾時到期, 要多此兩舉login再download file? 簡直係除褲放屁!

2009年1月30日

短訊拜年

嘩原本音語可能真係無乜朋友!

話說近年興起send sms 拜年, 音語每年都會收到一d朋友或保險經紀等的拜年短訊.

但好景不常, 今年音語竟然只係收到一封拜年短訊, 仲要係由三唔識七既松板鋼琴城send 來!

不過話分兩頭, 經濟唔好呢d無謂既使費其實真係可免則免, 再者拜年都係親身有誠意多d, 至少都打個電話啦!

2009年1月24日

長假期

人的腦袋真係幾古怪, 毎逄聖誕新年長假期,時間觀念總會有所改變。

例如聖誕節,音語經常會唔記得果日係星期幾; 平時今日係農曆幾號無幾可知; 但一到過年,音語就突然會識得而唔記得今日新曆係邊日...

或者呢d就係叫holiday mood 掛... 無論如何,音語都在此同大家拜年,祝大家牛年身體健康,金牛滿屋!

2009年1月23日

最佳男主角

今朝落馬洲嚴重交通意外, 據報憎突叟接報後即時到場做騷慰問車禍死者家屬.

姑勿論突叟動機如何, 但佢能夠放下手頭所有更重要工作(定係跟本無野做?)即時到場本來都可表現出佢體察民情一面. 但鏡頭一轉, 竟然見到我地偉大愛民如子既突叟在維園行花市兼同市民拜早年, 可謂悲喜交集.

其實發生左咁大單唔開心野係唔係應該平服下心情先呢? 定係突叟已經看破生死, 故可以咁快轉變心情?



林憶蓮 - 最佳男主角
作詞:林振強
作曲:Carly Simon
編曲:Andrew Tuason

你一到 如男主角
如從前驅使舉世傾慕 言談和瀟洒笑容
危險眼神 全精心精確編造
頭顱加些適當傾斜度 隨便卻也恰好
演出酒脫 多少女性被醉倒 見你便醉倒

你好戲 奧斯卡金獎應頒予給你
了不起 (極了不起)
投入到永未似在演戲 演戲 演戲

往昔我完全給你時 純真兼不太懂事
你的嘴頗精通迷人的語言 如香檳寫的句子
遲遲方知穿你真名字 名不羈姓可恥
捨香檳泡 今天我喝熱咖啡 我喝熱咖啡

你好戲 奧斯卡金獎應頒予給你
了不起 (極了不起)
投入到永未似在演戲 趕戲 演戲 趕戲

捨香檳泡 今天我喝熱咖啡 我喝熱咖啡

別來無恙

今日無意中聽到呢首歌, 雖然陳慧琳應該無呢方面經驗唱唔到個神緒, 歌詞亦有些少夾硬砌, 但首歌真係好正.

呢兩日本來仲成日唱住波兒(成龍版),今日都變左唱呢首歌喇!



作曲: Robert Lay@On Your Mark
編曲: Robert Lay@On Your Mark
填詞: 方杰

不想給碰到 終於都碰到
街中偶遇你 你卻不會走前我一步
為何做不到情人 總變得這麼恐怖
我跌倒 你終於肯看到

講一聲你好 講一聲我好
怎可意料到 你說娶了她 是你驕傲
別提及她怎麼好 反正我不想知道
我也想嫁你 但天知道

回頭數 曾於分手 講過別後願無恙
但我這些年來 幾多次愛 何故未見將來
命太好 從不希罕擁抱
為何又要 這般掛心從前
明年碰見 容我說句不想再見

分開走也好 一起走更好
一早領悟到 我再走也不能到出路
若然是不知所措 應說看到她的肚
我看到 我眼淚忍不到

回頭數 曾於分手 講過別後願無恙
但我這些年來 幾多次愛 何故未見將來
命太好 從不希罕擁抱
為何又要 這般掛心從前
突然碰見 還介紹你妻子

回頭數 曾於分手 講過別後願無恙
但我這些年來 幾多次愛 全數是我敷衍
命太好 從不希罕擁抱
為何又要 這般掛心從前
明年碰見 求你扮作 不忍看見

2009年1月14日

喜訊

雖然呢個仆無乜人睇,又,要知既人應該已經知左,但音語都要在此宣佈一個喜訊,就係:

生左喇生左喇!必必的弟弟在一月五日下午四時二十五分出生, 身長52公分, 體重3.07公斤!

恭喜恭喜,09年第一件喜訊!

2009年1月13日

零九投資策略

Disclaimer: 以下只係音語投資基金2009年投資策略。 本基金表現其實唔係咁好, 如果你唔經思考亂咁跟黎買, 所有損失貴客自理。

1. 組合內股票都穩穩陣陣,暫時無需換馬。
2. 相信今年熊市未完,股市有波幅無升幅。
3. 組合之打和點約於16800點,預計今年繼續坐艇。
4. 月供計劃會繼續,市况低迷月供可越買越多,是累積股票的良機。
5. 除了月供今年亦希望可從波幅中取利,所以會多些短炒。
6. 短炒對象將盡量維持組合內股票,因為股票穩健即使睇錯方向亦可hold住。 (即係短炒變長渣??)
7. 去年除了月供外只買賣各五次,相信今年買賣會多些。
8. 唔識玩輪玩牛熊證所以只會等股票跌先入市。無時間長期睇實個市,亂咁玩只係會淪為大户點心。
9. 最後十二字口訣總結今年策略: 保留實力,累積財富,短炒取利。

2009年1月12日

究竟係乜都唔渣定係只係渣八九線股?

閱以下文章, 覺所言有理, 故轉載之.


申報利益
文啟明

股票興旺的時候,碰口碰面都是股神。因而,所謂「貼士」也無處不在,尤其報章的財經專欄,更以搜尋「貼士」為己任。當所謂「貼士」登出後,隨時招來大批對股市不甚研究的散戶所追捧。影響之下,算是假料,也隨時變成真正「貼士」而大升特升。

為了提防其中涉及的利益關係—譬如「貼士」可能是背後造市者借傳媒口中發放,又或推薦者本身持有該種股票……不知何時開始,有關人士在傳媒分析某些股票後,便得主動申報是否持有該等股票。但不知大家有否發現一個有趣現象,譬如電視財經節目,當主持人最後詢問嘉賓有否持有所述股票時,十個有九個半都答沒有。

筆者覺得有趣的是—他們說過的,大多是滙豐中移、長實新地或六行三保的藍籌龍頭股,但為何九個半嘉賓也沒有持有?況且其中不少觀點是看好後市啊。那到底他們會買什麼股票?是二三線?還是他們從不沾手股票呢?

不難想像,當中不少嘉賓是在說謊。所謂申報利益,似乎沒有什麼監管,不提也罷。一來財不可露眼,二來若投資錯誤,多少也會影響形象或公司招牌。

既然如此,大家是否要相信他們的分析,應該心中有數。

2009年1月6日

曹蛇三招

尋晚睇曹蛇,佢講對付危機三招,分別係準、快、即時行動。

對照自己,發覺自己準還可以(十次都有四五次啦);快就一定唔係(成日都想睇定d先結果走雞); 即時行動就絶對失敗(成日要排低幾格結果買唔到)。

對比十月大跌市到依家,大大話話miss左四五次短炒機會,如果唔係舊年應該跑贏大市。再同hana成績比較,實在慚愧.

註:曹蛇危機三招可於2分45秒左右看到。

2009年1月4日

Dilbert

厡來Dilbert除左漫畫仲有動畫!以下影片剛剛上星期五發生在音語身上, 咁想唔轉貼都唔得啦!

Changes
Changes

2009年1月1日

新春長跑

記得二零零八年第一天,我和三點MSN聊了幾句後,便去跑步,為渣兜馬拉松10km作練習。當天是我為零八賽事的第一次練習。

二零零九年第一天,我沒有和三點MSN,但依舊去跑步。

雖然今年提早三個月開始練習,但速度完全沒法提升,都係咁慢。

仲有一個月多幾日就要跑,希望改變操練模式有助提高速度啦,唔係第日點跑半馬呀?

另外,希望出年怒火會重出江湖,我墊你底。

千年蟲再襲地球

科技既野,有時真係估你唔到。

零八年已經算係差,點知零九年一開始就整單咁既野,真係唔好兆頭。

有關方面唔肯透露受影響人數,似乎受影響人數一定好多。微軟使咁多錢賣廣告,我估點都多人用過iPod掛?

吓?你未聽過?咁一定係你見識少啦!大名鼎鼎既Zune如果你未聽過,你一定好打有限。

令人聞風喪胆既千年蟲再襲地球,問你驚唔驚?




微軟Zune死機 (16:54)
2009年1月1日

微軟生產的Zune音樂播放器出現技術故障,用家未能開啟播放器,只能看到Zune的標誌。

Zune用家在新一年伊始,即在網上投訴,他們不能使用30G版本的Zune播放器,因每當開啟播放器,它就會停留在標誌上,顯示正在啟動系統。

微軟Zune的支援網站貼出告示,承認已知悉問題,並進行修理,如有新進展,將通知用戶。微軟指出,故障可能涉及一個內部時鐘,但沒有透露詳情,微軟亦拒絕透露,受影響播放器的數量。這令人想起可能涉及如2000年的「千年蟲」問題。

(美聯社)