King Kong

又一個童年疑團終於解開了！

音語記得大約30年前睇過 King Kong 呢部電影。電影內容已經唔記得了，但音語記得最尾一幕，King Kong 從康樂大廈跌落黎，跌到隔黎郵政總局而死。

但返查記錄，1976年版King Kong 係在已故既世貿中心 World Trade Center 跌落黎。而最舊1933年版則在帝國大廈 Empire State Building 跌落黎，兩部片都唔係在香港拍攝。

但音語真係清清楚楚記得康樂大廈D圓形窗同跌爛郵政總局呢一幕喎，點解呢？

終於，呢個三十年既疑團今日在上網中無意解開喇！

原來當年音語睇既並唔係外國版King Kong, 而係邵氏出品，必屬佳片既猩猩王！

呢部片原來係邵氏參照1976年King Kong而拍攝，耗資800萬，仲專程去印度取景及邀請日本特撮精英作指導，可謂誠意可嘉。 所搭建既香港街道，尤其係最尾一幕康樂大廈同郵政總局，難怪音語念念不忘啦！

有興趣網友可以到以下 youtube chip 觀賞此套經典電影，特別要留意從7分30秒開始猩猩王爬上康樂大廈呢一幕經典呀！

http://hk.youtube.com/watch?sdig=1&v=KHGUtIAjtoA

最後一提，以下係猩猩王既trailer. 以前D電影片頭露點一D問題都無，相比依家比盲光社D人亂咁攪，似乎香港真係民智越來越閉塞了....