/

2009年9月3日

我的十五套電影

只係列舉在戲院睇過既電影:

1. 英雄本色: 港產片中既經典。 睇完套戲點可以無件Mark哥褸旁下身架? (其實67年龍剛版都好好睇, 四哥好形, 不過因為只係在電視睇所以不在十五套之內)。

2. 大都會 Metropolis: 1927年既劃時代巨獻。 片中對未來既視野描繪可謂走在時代尖端, 對後世電影界影響甚大。 音語係在某年藝術節在大會堂看的。

3. 超人特攻隊 The Incredibles: 呢套緊係正啦, 如果唔係我都唔會攞Elastigirl 黎做我既頭像啦! 呢套亦係我同佢唯一一套單獨睇既電影。

4. 超人 Superman: 對少年音語黎講超人真係偶像中既偶像。 Christopher Reeve 個樣真係好似漫畫中既超人。 最尾一幕反轉飛行令到時光倒流Lois Lane 復活真係好感人!

5. 鬼馬雙星:係音語有印象中第一套睇既戲(其實都無乜印象架)。

6. 鐵甲無敵瑪利亞: 套戲其實好一般, 但係音語第一套一個人睇既戲, 故此一記。 唯一值得一提係先鋒二號瑪利亞改造過後的外型好似大都會入面既瑪利亞, 應該係salute 黎既。

7. 最佳拍檔: 阿Sam 轉投新藝城第一炮。 當年呢套片大收二千七百萬, 更成為到目前為止香港最高入場人次的港產片, 音語都入戲院睇左兩次。 根據資料如果換算成current dollar最佳拍檔係香港有史以來最賣座既電影。

8. 鐵金剛勇破太空城 Moonraker: 占士邦片中音語最深印象係呢套, 主要原因係鋼牙佬。 又, 想當年睇占士邦片每當老占要同女主角埋牙肉摶時阿媽都要音語掩埋隻眼, 而想當年音語恰下恰下又竟然真係無講大話有掩住隻眼唔睇喎。

9. 月黑高飛 The Shawshank Redemption: 一套睇完會令人對世界充滿希望既電影。 當年上畫時可惜遇著Forrest Gump, 所以雖然奧斯卡七項提名但都空手而回。 但一套偉大電影係唔會被埋沒既。 後來月黑高飛被選為史上最偉大電影. 際遇其實都同電影內容有幾分似喎。

10. 情書 Love Letter: 藤井樹. 小樽. お元気ですか。私は 元気です。

11. 賭神: 同陳金城賭局一場戲真係峰迴路轉。 摸戒指動作同隱型液晶型顯體眼鏡真係估你唔到。

12. 搶錢家族: 竟然wiki無呢套片? 想當年在影藝做足524日橫跨三年, 做左好耐都仲係要排長龍先買到飛睇。 你無理由未睇過掛?

13. 重慶森林: 一套完全拍出村上春樹風格既電影。 仲記得金城武d 菠蘿罐頭嗎?

14. 花樣年華六十年代是最美的。 本片沖印出黎既六十年代亦相當美麗。

15. 拿破崙 Napoleon: 片長330分鐘, 由下畫2:30做到十點(中間有兩個小break同個半鐘dinner大break)有小交響樂團伴奏, 到最尾一幕仲要有三聯式播放, 可以稱為史詩式電影。 詳情可看戲院誌對本片既描述。 套戲咁長咁經典, 音語覺得睇完應該每人俾返張奬狀至啱。

3 嘉賓題字:

篤篤篤撐 說...

1. 英雄本色: 我都有件Mark哥褸

2. 大都會 Metropolis: 以前成日見dvd, 始終冇買過睇

3. 超人特攻隊 >>>第一次睇卡通片會拍手掌

4. 超人 Superman: 我個女都叫LOIS !!KAKA

5. 鬼馬雙星:竟然冇睇過 !!!

6. 鐵甲無敵瑪利亞: 葉倩文最索時候

7. 最佳拍檔: 第一幕飛車, 係在沙田第一城拍的 !!

8. 鐵金剛勇破太空城 Moonraker: 占士邦真係分唔到邊套打邊套, 套套戲名都差不多

9. 月黑高飛 The Shawshank Redemption: TIM ROBINS最令人記得既電影

10. 情書 Love Letter:BINGO !!


11. 賭神: 我唔得WOR, 呢套。臨尾突然話自己有高科技隱形眼鏡, 同突然有人話:"我係你老豆"一樣O甘突兀 !!

12. 搶錢家族: 究竟有冇睇過呢 ?

13. 重慶森林: 金城武話跑步O甘私人既野...仲有, 我唔明, 點解做警察可以成日走番屋企呢 ?

14. 花樣年華: 王家衛狀態顛峰之作。

15. 拿破崙 Napoleon: 冇睇過TIM

程音語 說...

>> 我個女都叫LOIS

好名呀!

richmapoor ma 說...

我在戲院只看過超人特攻隊和情書.

之後還買了vcd珍藏及重看.